સૌરાષ્ટ્રમાં આજે સતત બીજા દિવસે પણ ભારે ઉકળાટ બાદ બપોર બાદ વરસાદી માહોલ જામ્યો હતો. બપોર બાદ વાદળછાયા વાતાવરણ વચ્ચે જસદણ પંથકમાં ગાજવીજ સાથે ધોધમાર એક ઈંચ વરસાદ વરસ્યો હતો. જસદણના શિવરાજપુર ગામમાં ધોધમાર વરસાદથી રસ્તાઓ પર પાણી ભરાયા હતા અને ખેતરો પાણી પાણી બનતા ખેડૂતો ચિંતામાં મૂકાયા છે. તેમજ ધારીમાં પોણો ઈંચ વરસાદ નોંધાયો છે.
ગીર ગઢડા પંથકમાં આજે એક કલાકમાં એકથી ત્રણ ઈંચ વરસાદ વરસતા નદી-નાળા છલકાયા હતા. ગીર ગઢડા પંથકમાં આજે બીજા દિવસે પણ વરસાદી માહોલ જામ્યો હતો. બપોર બાદ ગાજવીજ સાથે ધોધમાર વરસાદ વરસ્યો હતો. ગીર ગઢડાના વેળાકોટ, ખીલાવડ, ધોકડવા સહિતના ગામોમાં એક કલાકમાં એકથી ત્રણ ઈંચ વરસાદ ખાબક્યો હતો. ગઈકાલે પણ દોઢ ઈંચ વરસાદ નોંધાયો હતો. ધારી શહેરમાં આજે સવારથી જ અસહ્ય ઉકળાટ અને ગરમીથી લોકો કંટાળી ગયા હતા.
અધૂરામાં પૂરુ શહેરમાં નવી વસાહતમાં બપોરના સમયે એક ટ્રક ચાલક વીજપોલ સાથે અથડાતા આ વિસ્તારમાં વીજળી ગુલ થઇ હતી. જેને કારણે લોકો અકળાયા હતા. બપોર બાદ ૪ વાગ્યા ગાજવીજ સાથે વરસાદ શરૂ થયો હતો અને પોણો ઇંચ વરસાદ પડ્યો હતો. ધારીના ગ્રામ્ય વિસ્તારોમાં પણ વરસાદ પડ્યાના સમાચાર છે.
ગીર ગઢડામાં ૧ કલાકમાં ૩, જસદણ પંથકમાં ૧ વરસાદ
