ભારતે ઘરઆંગણે સળંગ 17મી ટેસ્ટ સીરિઝ જીતી

ભારતીય ક્રિકેટ ટીમે રાંચીમાં રમાયેલી ચોથી ટેસ્ટ મેચમાં ઈંગ્લેન્ડ સામે પાંચ વિકેટે વિજય નોંધાવ્યો છે. આ સાથે જ રોહિત શર્માની ટીમે પાંચ મેચની સીરિઝમાં 3-1ની અજેય સરસાઈ મેળવી લીધી છે. ટેસ્ટ સીરિઝની પાંચમી અને અંતિમ મેચ 7 માર્ચથી ધરમશાલામાં રમાશે. જોકે, આ શ્રેણી વિજય ઘરઆંગણે ભારતનો સળંગ 17મો શ્રેણી વિજય છે. ભારતીય ટીમ છેલ્લે ઘરઆંગણે છેલ્લે 2012માં ઈંગ્લેન્ડ સામે ટેસ્ટ શ્રેણી હારી હતી. ત્યારબાદ ટીમે એક પણ ટેસ્ટ શ્રેણી ગુમાવી નથી. આમ જોઈએ તો ટીમ ઈન્ડિયાએ ઘરઆંગણે ઈંગ્લેન્ડ સામે ટેસ્ટ સીરિઝ જીતવાની હેટ્રિક લગાવી છે. ભારતે ઘરઆંગણે ઈંગ્લેન્ડ સામે બે વખત શ્રેણી જીતી છે.

આ ઉપરાંત ભારતીય ટીમ ઘરઆંગણે સતત 17 ટેસ્ટ શ્રેણી જીતનારી પ્રથમ ટીમ બની છે. તેની આસપાસ વિશ્વની બીજી કોઈ ટીમ નથી. ઓસ્ટ્રેલિયા અને ઈંગ્લેન્ડ જેવી ધરખમ ટીમો પણ પોતાના ઘરઆંગણે સળંગ આટલી ટેસ્ટ શ્રેણી જીતી શકી નથી. ભારત બાદ બીજા ક્રમે ઓસ્ટ્રેલિયા છે જેણે ઘરઆંગણે સળંગ 10 ટેસ્ટ સીરિઝ જીતી છે. જોકે, ઓસ્ટ્રેલિયાએ ઘરઆંગણે સળંગ બે વખત 10 ટેસ્ટ સીરિઝ જીતી છે અને આ સિદ્ધિ નોંધાવનારી તે પ્રથમ ટીમ છે. તેણે પહેલા નવેમ્બર 1994થી નવેમ્બર 2000 દરમિયાન ઘરઆંગણે સળંગ 10 ટેસ્ટ સીરિઝ જીતી હતી. ત્યારબાદ જુલાઈ 2004થી નવેમ્બર 2008 દરમિયાન બીજી વખત સળંગ 10 ટેસ્ટ સીરિઝ જીતી હતી.

આ યાદીમાં ભારત 17 ટેસ્ટ સીરિઝ સાથે પ્રથમ સ્થાને છે. જ્યારે બે વખત 10-10 ટેસ્ટ સીરિઝ સાથે બીજા અને ત્રીજા સ્થાને ઓસ્ટ્રેલિયા છે. વેસ્ટ ઈન્ડિઝે માર્ચ 1976થી ફેબ્રુઆરી 1986 દરમિયાન ઘરઆંગણે સળંગ 8 ટેસ્ટ સીરિઝ જીતી હતી. જ્યારે માર્ચ 1998થી નવેમ્બર 2001 દરમિયાન સળંગ સાત ટેસ્ટ શ્રેણી જીતી હતી. સાઉથ આફ્રિકા મે 2009થી મે 2012 દરમિયાન ઘરઆંગણે સળંગ સાત ટેસ્ટ સીરિઝમાં અજેય રહ્યું હતું. ભારતના સળંગ 17 ટેસ્ટ શ્રેણી જીતવાના અભિયાનની શરૂઆત 2013માં ઓસ્ટ્રેલિયા સામે થઈ હતી. ત્યારે ભારતે ઓસ્ટ્રેલિયા સામે ચાર ટેસ્ટની સીરિઝ 4-0થી જીતી હતી.

બીજી તરફ ઈંગ્લેન્ડની વાત કરવામાં આવે તો ઈંગ્લેન્ડ ભારતમાં છેલ્લે 2012-13માં ભારતમાં શ્રેણી જીતી શક્યું હતું. એટલે કે ઈંગ્લેન્ડની ટીમ છેલ્લા 11 વર્ષથી ભારતમાં ટેસ્ટ શ્રેણી જીતી શક્યું નથી. ઈંગ્લેન્ડે ભારતીય ધરતી પર 17 ટેસ્ટ શ્રેણી રમી છે જેમાંથી પાંચમાં જ તેનો વિજ થયો છે. જ્યારે નવ ટેસ્ટ શ્રેણીમાં તેને પરાજયનો સામનો કરવો પડ્યો છે. બંને ટીમો વચ્ચે ત્રણ ટેસ્ટ સીરિઝ ડ્રો રહી છે. ભારત અને ઈંગ્લેન્ડ વચ્ચે અત્યાર સુધી 36 ટેસ્ટ શ્રેણી રમાઈ છે જેમાં 12માં ભારતનો વિજય થયો છે. જ્યારે 19માં તેને પરાજયનો સામનો કરવો પડ્યો છે. પાંચ ટેસ્ટ સીરિઝ ડ્રો રહી છે.

ભારત અને ઈંગ્લેન્ડ વચ્ચે રમાયેલી કુલ ટેસ્ટ મેચની વાત કરીએ તો બંને ટીમો વચ્ચે અત્યાર સુધી 135 ટેસ્ટ મેચ રમાઈ છે. જેમાંથી ભારતીય ટીમે 34 ટેસ્ટ જીતી છે જ્યારે 51માં ઈંગ્લેન્ડનો વિજય થયો છે. બંને વચ્ચે 50 ટેસ્ટ ડ્રો રહી છે. ભારતીય ધરતી પર બંને ટીમો વચ્ચે 68 ટેસ્ટ રમાઈ છે જેમાંથી ઈંગ્લેન્ડ ફક્ત 15 ટેસ્ટ જીતી શક્યું છે. જ્યારે 25માં ભારતનો વિજય થયો છે. 28 મેચ ડ્રો રહી છે.

Related posts