રોહિત શર્મા બન્યો ટીમ ઓફ ધ યર 2023નો કેપ્ટન

રોહિત શર્માને આઈસીસી વન-ડે ક્રિકેટ ટીમ ઓફ ધ યરનો કેપ્ટન બનાવવામાં આવ્યો છે. આ ટીમમાં છ ભારતીય ખેલાડીઓને સ્થાન આપવામાં આવ્યું છે. જેમાં સ્ટાર બેટ્સમેન વિરાટ કોહલી અને મોહમ્મદ શમી તથા મોહમ્મદ સિરાજની ફાસ્ટ બોલિંગ જોડી અને વધુ બે ભારતીય ખેલાડીઓનો સમાવેશ થાય છે. ઈન્ટરનેશનલ ક્રિકેટ કાઉન્સિલ (ICC)ના નિવેદન અનુસાર ટીમમાં સ્થાન મેળવનારા મોટાભાગના ખેલાડીઓ આઈસીસી વન-ડે વર્લ્ડ કપ 2023ની ફાઈનલમાં પહોંચેલી રનર અપ ભારતીય ટીમ અને ચેમ્પિયન ઓસ્ટ્રેલિયન ટીમ ઉપરાંત સેમિફાઈનલમાં પહોંચનારી ન્યૂઝીલેન્ડ અને સાઉથ આફ્રિકન ટીમના છે. જ્યારે ટેસ્ટ ટીમ ઓફ ધ યરમાં ઓલ-રાઉન્ડર રવિન્દ્ર જાડેજા અને રવિચંદ્રન અશ્વિન બે જ ભારતીય ખેલાડીઓ સામેલ છે. જ્યારે ઓસ્ટ્રેલિયાના પેટ કમિન્સને ટેસ્ટ ટીમ ઓફ ધ યરનો કેપ્ટન બનાવવામાં આવ્યો છે.

રોહિત શર્મા અને શુભમન ગિલને આ ટીમના ઓપનર બનાવવામાં આવ્યા છે. ભારતીય કેપ્ટન રોહિત શર્મા ગયા વર્ષે વન-ડે ફોર્મેટમાં 52ની એવરેજથી 1255 રન નોંધાવ્યા હતા. જ્યારે શુભમન ગિલે ન્યૂઝીલેન્ડ સામે 208 રનની ઈનિંગ્સ રમી હતી અને તે આ ફોર્મેટમાં 1584 રન સાથે સૌથી વધુ રન નોંધાવનારો ખેલાડી હતો. ઓસ્ટ્રેલિયાના ટ્રેવિસ હેડને ત્રીજું સ્થાન મળ્યું છે, જેણે ગયા વર્ષે સારું પ્રદર્શન કર્યું હતું અને ભારત સામે રમાયેલી વર્લ્ડ કપની ફાઈનલમાં 137 રનની મેચ વિનિંગ ઈનિંગ્સ રમી હતી.

મિડલ ઓર્ડરમાં ભારતીય સ્ટાર વિરાટ કોહલી, ન્યૂઝીલેન્ડનો ડેરીલ મિશેલ અને સાઉથ આફ્રિકાના હેનરિક ક્લાસેન અને માર્કો જેન્સેનનો સમાવેશ થાય છે. કોહલી 1337 રન સાથે વન-ડે ફોર્મેટમાં સૌથી વધુ રન નોંધાવનારા બેટ્સમેનોમાં બીજા ક્રમે રહ્યો હતો. તેણે ગયા વર્ષે છ સદી ફટકારી હતી. તેણે વન-ડે ફોર્મેટમાં સચિન તેંડુલકરની સૌથી વધુ સદીનો રેકોર્ડ તોડ્યો હતો અને તેને વર્લ્ડ કપનો સર્વશ્રેષ્ઠ ખેલાડી જાહેર કરવામાં આવ્યો હતો.

મિશેલે પાંચ સદીની મદદથી 52.34ની એવરેજ અને 100.24ની સ્ટ્રાઈક રેટથી 1204 રન ફટકાર્યા હતા. જ્યારે ક્લાસેને પણ સમગ્ર વર્ષ દરમિયાન દબદબાભેર પ્રદર્શન કર્યું હતું. તેણે સેન્ચુરિયનમાં ઓસ્ટ્રેલિયા સામે 174 રનની મેચ વિનિંગ ઈનિંગ્સ પણ રમી હતી. સિરાજ, શમી અને કુલદીપ યાદવની ભારતીય ત્રિપુટી સિવાય ઓસ્ટ્રેલિયાના એડમ ઝમ્પાને બોલિંગ આક્રમણમાં સ્થાન મળ્યું છે. ઝમ્પાએ 26.31ની એવરેજથી 38 વિકેટ લીધી હતી અને સતત ત્રણ વર્લ્ડ કપ મેચમાં ચાર વિકેટ ઝડપી હતી. વર્લ્ડ કપમાં સૌથી વધુ વિકેટ લેનાર બોલરોની યાદીમાં તે બીજા સ્થાને રહ્યો હતો.

સિરાજે ગયા વર્ષે 44 વિકેટ ઝડપી હતી જેમાં શ્રીલંકા સામે એશિયા કપ ફાઈનલમાં 21 રન આપીને છ વિકેટ સામેલ હતી. એશિયા કપની ફાઈનલમાં ભારતે શ્રીલંકા સામે એકતરફી જીત નોંધાવી હતી. કુલદીપ યાદવે ગયા વર્ષે 49 વન-ડે વિકેટ પોતાના નામે હતી. તેનું સર્વશ્રેષ્ઠ પ્રદર્શન એશિયા કપના સુપર ફોર સ્ટેજમાં પાકિસ્તાન સામે 25 રનમાં પાંચ વિકેટ હતું. મોહમ્મદ શમીએ સમગ્ર વર્ષ દરમિયાન શાનદાર પ્રદર્શન કર્યું હતું અને ચાર વખત ઈનિંગ્સમાં પાંચ કે તેથી વધુ વિકેટ ઝડપી હતી. તેનું સર્વશ્રેષ્ઠ પ્રદર્શન મુંબઈમાં વર્લ્ડ કપ સેમીફાઈનલમાં ન્યુઝીલેન્ડ સામે 57 રનમાં સાત વિકેટનું હતું. કોઈપણ ભારતીય ખેલાડીને ICC વિમેન્સ વન-ડે ટીમ ઓફ ધ યરમાં સ્થાન મળ્યું નથી.

ICC વન-ડે ટીમ ઓફ ધ યરઃ રોહિત શર્મા (કેપ્ટન, ભારત), શુભમન ગિલ (ભારત), ટ્રેવિસ હેડ (ઓસ્ટ્રેલિયા), વિરાટ કોહલી (ભારત), ડેરીલ મિશેલ (ન્યૂઝીલેન્ડ), હેનરિક ક્લાસેન (વિકેટકીપર, સાઉથ આફ્રિકા), માર્કો જેનસેન (સાઉથ આફ્રિકા), એડમ ઝમ્પા (ઓસ્ટ્રેલિયા), મોહમ્મદ સિરાજ (ભારત),
કુલદીપ યાદવ (ભારત), મોહમ્મદ શમી (ભારત).

ICC ટેસ્ટ ટીમ ઓફ ધ યર: ઉસ્માન ખ્વાજા (ઓસ્ટ્રેલિયા), દિમુથ કરુણારત્ને (શ્રીલંકા), કેન વિલિયમસન (ન્યૂઝીલેન્ડ), જો રૂટ (ઈંગ્લેન્ડ), ટ્રેવિસ હેડ (ઓસ્ટ્રેલિયા), રવિન્દ્ર જાડેજા (ભારત), એલેક્સ કેરી (વિકેટકીપર, ઓસ્ટ્રેલિયા), પેટ કમિન્સ (કેપ્ટન, ઓસ્ટ્રેલિયા), રવિચંદ્રન અશ્વિન (ભારત), મિશેલ સ્ટાર્ક (ઓસ્ટ્રેલિયા), સ્ટુઅર્ટ બ્રોડ (ઈંગ્લેન્ડ).

Related posts