Appleએ Samsungને પછાડી, બની ગઈ વિશ્વની ટોચની સ્માર્ટફોન સેલર કંપની

એપલ હવે વિશ્વની ટોપ સેલર સ્માર્ટફોન બ્રાન્ડ બની ગઈ છે. અમેરિકન કંપનીએ છેલ્લા 12 વર્ષથી ચાલી રહેલા સેમસંગના દબદબાનો અંત લાવી દીધો છે. ઈન્ટરનેશનલ ડેટા કોર્પના રિપોર્ટ પ્રમાણે 2023માં એપલનો માર્કેટ શેર 20 ટકા રહ્યો હતો અને આ સાથે તે વિશ્વની સૌથી મોટી સ્માર્ટફોન સેલર કંપની બની ગઈ છે. એટલું જ નહીં પરંતુ ટોચની ત્રણ કંપનીઓમાં એપલ એકમાત્ર એવી કંપની હતી જેણે હકારાત્મક વૃદ્ધિ દર્શાવી હતી. ડેટા મુજબ એપલે ચોથા ક્વાર્ટરમાં 80.5 મિલિયન આઈફોન યુનિટ્સ વેચ્યા હતા જે 11.6 ટકા વાર્ષિક વૃદ્ધિ દર્શાવે છે. બીજી તરફ 2023માં સેમસંગનો માર્કેટશેર 19.4 ટકા રહ્યો હતો. ત્યારપછી ચાઈનાની કંપની શાઓમી, ઓપ્પો અને ટ્રાન્સનનો નંબર આવે છે. Xiaomi 12.5 ટકા બજાર હિસ્સા સાથે ત્રીજા સ્થાને રહી હતી.

સ્માર્ટફોન કંપનીઓ માટે 2023નું વર્ષ થોડું કપરૂં રહ્યું હતું. જેમાં મોંઘવારી અને આર્થિક અચોક્કસતાના કારણે ગ્રાહકોએ પોતાના સ્માર્ટફોન અપગ્રેડ કરવામાં ઓછો રસ દાખવ્યો હતો અને લોકોએ સસ્તા હેન્ડસેટની પસંદગી કરી હતી. આવા કપરા વર્ષમાં પણ એપલે શાનદાર દેખાવ કરીને સેમસંગને પાછળ રાખી દીધી છે. આ ઉપરાંત ચીનમાં અપેક્ષાથી ઓછા રિકવરી રેટના કારણે પણ સ્માર્ટફોનના વેચાણ પર અસર પડી છે. ચીન વિશ્વનું સૌથી મોટું સ્માર્ટફોન માર્કેટ છે.

આઈડીસીના વર્લ્ડવાઈડ મોબિલિટી એન્ડ કન્ઝ્યુમર ડિવાઈસ ટ્રેકર્સના ગ્રૂપ વાઇસ પ્રેસિડેન્ટ રેયાન રીથે જણાવ્યું હતું કે, સેમસંગના રેન્કમાં ઘટાડામાં એપલે ચોક્કસપણે ભાગ ભજવ્યો છે, પરંતુ એકંદર એન્ડ્રોઈડ સ્પેસ પોતાની અંદર વૈવિધ્યીકરણ કરી રહી છે. સેમસંગ અને Xiaomi સહિત ત્રણ મોટા સ્માર્ટફોન ઉત્પાદકોમાં એપલ એકમાત્ર કંપની છે, જે વર્ષ-દર-વર્ષ શિપમેન્ટમાં વૃદ્ધિ કરે છે. Appleએ 2023 માં તેના શિપમેન્ટમાં 226.3 મિલિયન યુનિટથી 234.6 મિલિયન યુનિટનો વધારો કર્યો હતો. Oppo અને ટ્રાન્સન હોલ્ડિંગ Infinix, Tecno અને itelના ઓનર છે જે અનુક્રમે 8.8 ટકા અને 8.1 ટકા બજાર હિસ્સો ધરાવે છે જ્યારે અન્ય બ્રાન્ડ્સનો બજાર હિસ્સો 31 ટકા છે.

રિસર્ચ કંપની કેનાલિસના અમ્બર લિયુએ જણાવ્યું હતું કે, સેમસંગે પોર્ટિબિલિટી માટે મિડથી હાઈ એન્ડ સેગમેન્ટ પર ધ્યાન કેન્દ્રીત કર્યું હતું પરંતુ લો-એન્ડ સેગમેન્ટમાં તેણે પોતાનો હિસ્સો ગુમાવ્યો હતો. જોકે, એપલ માટે ચીનનું માર્કેટ પડકારજનક છે. ચીનમાં એપલને હુવેઈ તથા અન્ય ચાઈનીઝ બ્રાન્ડ તરફથી મજબૂત પડકાર મળે છે. ચીનમાં ગ્રાહકોને આકર્ષિત કરવા માટે આઈફોન બનાવતી કંપની તેના કેટલાક મોડલમાં પાંચ ટકા જેટલું ડિસ્કાઉન્ટ પણ આપી રહી છે. બીજી તરફ માઈક્રોસોફ્ટ ગત શુક્રવારે એપલને પાછળ રાખીને વિશ્વની સૌથી વેલ્યુએબલ પબ્લિક કંપની બની ગઈ છે.

એપલ વૈશ્વિક સ્તરે ટોચના સ્માર્ટફોન સેલર તરીકેની જવાબદારી સંભાળવા સાથે તે સ્માર્ટફોન ઉદ્યોગ માટે એક રસપ્રદ સમયનો સંકેત આપે છે. ટોચના સ્થાનેથી સેમસંગનું પતન દર્શાવે છે કે બજાર કેટલું સ્પર્ધાત્મક છે, વિવિધ કંપનીઓ ટોચનું સ્થાન મેળવવા માટે પ્રયત્નશીલ છે અને ટેક્નોલોજીની સીમાઓને આગળ ધપાવી રહી છે. સ્માર્ટફોન લેન્ડસ્કેપને આકાર આપતી નવી નવીનતાઓ અને તીવ્ર સ્પર્ધા સાથે ભવિષ્ય આશાસ્પદ લાગે છે.

Related posts