એક સમયે ભારતને ‘સોને કી ચિડીયા’ કહેવામાં આવતું હતું. એક અંદાજ મુજબ ભારતીય ઘરોમાં લગભગ 25,000 ટન સોનું છે. પરંતુ શું તમે જાણો છો કે વિશ્વના કયા દેશમાં સૌથી વધુ સોનાનો ભંડાર છે? જવાબ છે અમેરિકા. અમેરિકા એ વિશ્વની સૌથી મોટી અર્થવ્યવસ્થા ધરાવતો દેશ છે અને તેની તિજોરીમાં 8,133.46 ટન સોનું છે, જેની કિંમત લગભગ 4,89,133.74 મિલિયન ડોલર થાય છે. આ મામલે દુનિયાનો કોઈ દેશ અમેરિકાની નજીક પણ નથી. જેમ લોકો તેમના પોર્ટફોલિયોમાં સોનું રાખે છે, તેમ દેશો પણ તેમના અનામતમાં સોનું રાખે છે જેથી મુશ્કેલીના સમયે તેનો ઉપયોગ કરી શકાય. તાજેતરના સમયમાં તમામ દેશોની સેન્ટ્રલ બેંકોએ મોટાપાયે સોનાની ખરીદી કરી છે.
અમેરિકા પછી જર્મની પાસે સૌથી વધુ ગોલ્ડ રિઝર્વ છે. આ યુરોપિયન દેશની સેન્ટ્રલ બેંક પાસે તેની તિજોરીમાં 3,352.65 ટન સોનું છે જેની કિંમત 2,01,623.07 મિલિયન ડોલર છે. સૌથી વધુ સોનાનો ભંડાર ધરાવતા દેશોની યાદીમાં ઈટાલી ત્રીજા સ્થાને છે. તેની પાસે 1,47,449.64 મિલિયનની કિંમતનું 2,451.84 ટન સોનું છે. ફ્રાન્સ પાસે 1,46,551.80 મિલિયન ડોલરની કિંમતનું 2,436.88 ટન સોનું છે. આ યાદીમાં પાંચમું સ્થાન રશિયાનું છે જેની પાસે 2,332.74 ટન સોનું છે. યુક્રેન પર હુમલા પહેલા રશિયાએ અન્ય દેશો પાસે પડેલા તેના સોનાના ભંડારને પરત મોકલ્યો હતો. તેના સોનાના ભંડારની કિંમત 1,40,287.50 મિલિયન ડોલર છે.
ભારત પાસે કેટલું સોનું છે
વિશ્વની બીજી સૌથી મોટી અર્થવ્યવસ્થા ધરાવતો દેશ ચીન આ યાદીમાં છઠ્ઠા નંબર પર છે. તેની પાસે 1,31,795.43 મિલિયન ડોલરની કિંમતના 2,191.53 ટન સોનાનો ભંડાર છે. ચીને તાજેતરમાં તેના સોનાના ભંડારમાં ઝડપથી વધારો કર્યો છે. યુરોપના નાના દેશ સ્વિટ્ઝર્લેન્ડમાં 1,040 ટન સોનું છે જેની કિંમત લગભગ 62,543.91 મિલિયન ડોલર છે. આ યાદીમાં આઠમા નંબરે જાપાન છે. તેમની પાસે 50,875.51 મિલિયન ડોલરનું 845.97 ટન સોનું છે. આ યાદીમાં ભારત નવમા નંબરે છે. ભારતમાં 48,157.71 મિલિયન ડોલરની કિંમતનું 800.78 ટન સોનું છે. નેધરલેન્ડ પણ ટોપ 10માં સામેલ છે. આ યુરોપિયન દેશમાં 612.45 ટન સોનું છે જેની કિંમત 36,832.02 મિલિયન ડોલર છે.
વિશ્વભરની સેન્ટ્રલ બેંકોએ છેલ્લા સતત બે વર્ષથી 1000 ટનથી વધુ સોનાની ખરીદી કરી છે. નિષ્ણાતો કહે છે કે ડોલરની ઘટતી ખરીદશક્તિ સામે રક્ષણ મેળવવા માટે સોનું શ્રેષ્ઠ વિકલ્પ છે. છેલ્લા 110 વર્ષથી આવું થતું આવ્યું છે અને ભવિષ્યમાં પણ થતું રહેશે. ચલણ અને અર્થવ્યવસ્થા જોખમમાં હોય ત્યારે પણ કેન્દ્રીય બેંકો મોટા પાયે સોનું ખરીદે છે. અમેરિકા, ચીન અને યુરોપના ઘણા દેશોમાં મંદીની શક્યતા છે. ખાસ કરીને ચીન આર્થિક મોરચે ઘણી સમસ્યાઓનો સામનો કરી રહ્યું છે. જો ચીનની અર્થવ્યવસ્થા ડૂબી જશે તો તેની અસર આખી દુનિયા પર જોવા મળી શકે છે.
