મોબાઈલ આજકાલ લોકોની જરૂરિયાત નહીં પણ જાણે જિંદગીનો અગત્યનો ભાગ બની ગયો છે. પહેલા ફક્ત ફોન કરવા સુધી સીમિત મોબાઈલ હવે રૂપિયાના ટ્રાન્ઝેક્શન સુધીના બધા જ કામ આંગળીના ટેરવે કરી આપે છે. મોબાઈલથી એક મિનિટ પણ દૂર રહેવું લોકો માટે મુશ્કેલ બની જાય છે એવામાં જ્યારે મોબાઈલ ખોવાઈ જાય કે ચોરાઈ જાય ત્યારે તેના માલિકનો જીવ તાળવે ચોંટી જાય છે. મોબાઈલમાં અગત્યના પાસવર્ડ સહિત કેટલીય ડિટેલ્સ હોય છે જેનો મોબાઈલ ચોર દુરુપયોગ કરી શકે છે. પરંતુ હવે સરકાર એવી સિસ્ટમ લઈને આવી રહી છે જે ગેમચેન્જર સાબિત થઈ શકે છે. આ સિસ્ટમ થકી તમે તમારા ચોરાયેલા કે ખોવાયેલા ફોનને બ્લોક અને ટ્રેક કરી શકો છો. કેંદ્ર સરકાર દ્વારા ચાલુ અઠવાડિયા દરમિયાન જ ટ્રેકિંગ સિસ્ટમ શરૂ કરવામાં આવશે.
એન્ડ્રોઈડ યૂઝર્સને થશે ફાયદો
એપલમાં ખોવાઈ ગયેલા મોબાઈલ ફોનને ટ્રેક કરવાની સિસ્ટમ છે. એપલ આઈડી દ્વારા મોબાઈલ ટ્રેક કરી શકાય છે. એવામાં કેંદ્ર સરકાર દ્વારા લાગુ થવા જઈ રહેલી આ નવી સિસ્ટમ એન્ડ્રોઈડ યૂઝર્સ માટે ગેમચેન્જર સાબિત થઈ શકે છે. રિપોર્ટ પ્રમાણે, તાજેતરમાં જ કર્ણાટક પોલીસે 2500થી વધુ ખોવાયેલા મોબાઈલ CEIR સિસ્ટમની મદદથી શોધી કાઢીને તેમના માલિકોને પરત કર્યા હતા.