કર્ણાટકના રાજકારણમાં અત્યારે ભૂતપૂર્વ વડાપ્રધાન દેવ ગૌડાના પૌત્ર પ્રજ્વલ રેવન્નાના કારણે ધમાલ મચી ગઈ છે. રેવન્નાએ પોતાના ઘરની અંદર જ સેંકડો મહિલાઓનું જાતિય શોષણ કર્યું હોવાનો આરોપ છે અને 3000 અશ્લિલ વીડિયો બનાવ્યા હતા. આ અંગે કેસ થયા પછી પ્રજ્વલ અત્યારે જર્મની ભાગી ગયો છે અને હવે તેની પેન ડ્રાઈવની ચર્ચા ચાલે છે જેમાં આ તમામ અશ્લિલ વીડિયો છે. મહત્ત્વની વાત એ છે કે પ્રજ્વલે કામવાળીથી લઈને મહિલા ઓફિસરો અને કોર્પોરેટ સેક્ટરમાં કામ કરતી મહિલાઓનું પણ જાતીય શોષણ કર્યું હતું અને તેના વીડિયો બનાવ્યા હતા. ત્યાર પછી આ વીડિયોનો ઉપયોગ બ્લેકમેલિંગ માટે કરવામાં આવ્યો હતો. આ વિશે ભાજપને પણ કેટલાક મહિનાથી જાણ હતી છતાં કર્ણાટકમાં જનતાદળ (એસ) સાથે જોડાણ ચાલુ રાખ્યું હતું.
કર્ણાટકમાં ભાજપના એક નેતાએ આરોપ મૂક્યો છે કે તેમણે ડિસેમ્બર 2023માં પ્રદેશ પ્રમુખને પત્ર લખીને કહ્યું હતું કે તેમને એક પેન ડ્રાઈવ મળી છે જેમાં લગભગ 3000 મહિલાઓના અશ્લિલ વીડિયો છે. તેમાં સરકારી અધિકારીઓના વીડિયો પણ સામેલ છે. જનતાદળ (સેક્યુલર)ના સાંસદ પ્રજ્વલ રેવન્નાએ આ ફૂટેજનો ઉપયોગ કરીને મહિલાઓને બ્લેકમેલ કરી હતી અને તેની સાથે સંબંધ ચાલુ રાખ્યા હતા. આ અંગે રાજ્ય સરકારે SIT રચવાની જાહેરાત કરી ત્યાર બાદ તરત પ્રજ્વલ ભારત છોડીને જર્મની ભાગી ગયો છે.
દેવ ગૌડા એક સમયે ભારતના વડાપ્રધાન હતા અને હાલમાં તેઓ જનતાદળ (એસ)ના વડા છે. કર્ણાટકમાં 26 એપ્રિલે લોકસભાની ચૂંટણી માટે મતદાન થયું તેના બે દિવસ અગાઉ જ આ વીડિયો વાઈરલ થયા હતા.
ભાજપના નેતા દેવરાજે ગૌડાએ 8 ડિસેમ્બર 2023ના રોજ ભાજપના સ્ટેટ પ્રેસિડન્ટ વિજયેન્દ્રને એક પત્ર લખીને જણાવ્યું હતું કે “એચ ડી દેવ ગૌડા પરિવારના કેટલાક લોકો સામે ગંભીર આરોપો છે. તેમાં પ્રજ્વલ રેવન્ના પણ સામેલ છે જેની સાથે આપણે જોડાણ કર્યું છે અને જનતાદળ (એસ)નો ઉમેદવાર છે.” દેવરાજે ગૌડાએ જણાવ્યું કે તેમને એક પેન ડ્રાઈવ મળી છે જેમાં 2976 વીડિયો છે. તેમાંથી કેટલાક ફૂટેજમાં તો સરકારી અધિકારીઓે પણ જોવા મળે છે.