ભારતમાં જૂના અને અનફિટ વાહનોને સ્ક્રેપમાં કાઢવાની પોલિસી ઘડવામાં આવી ત્યાર પછી 21 રાજ્યોએ જૂના વાહનોના સ્ક્રેપિંગ માટે રોડ ટેક્સમાં રિબેટ આપવાની ઓફર કરી છે. રાજ્યોએ ફરજિયાતપણે જૂના વાહનોને સ્ક્રેપમાં નાખવાને પ્રોત્સાહન આપવાનું છે અને તેના માટે રાજ્યો પણ તૈયાર થઈ રહ્યા છે. ગુજરાત, યુપી, બિહાર, હરિયાણા, મધ્ય પ્રદેશ, કર્ણાટક અને મહારાષ્ટ્ર સહિત 21 રાજ્યો અથવા કેન્દ્રશાસિત પ્રદેશો (UT)એ રોડ ટેક્સમાં રાહત આપવાની પોલિસી જાહેર કરી છે. તે મુજબ જૂના વાહનને સ્ક્રેપમાં કાઢીને તેની સામે નવું વાહન ખરીદવામાં આવે તો રોડ ટેક્સમાં 25 ટકા સુધી રિબેટ અપાય છે. તેવી જ રીતે કોમર્શિયલ વાહનો માટે રોડ ટેક્સમાં 15 ટકા રિબેટ મળે છે.અત્યાર સુધીમાં દેશમાં લગભગ 70,000 વાહનોને સ્ક્રેપમાં કાઢવામાં આવ્યા છે. જોકે, તેમાંથી મોટા ભાગના વાહનો કેન્દ્ર અથવા રાજ્ય સરકારની માલિકીના છે. દિલ્હી એકમાત્ર એવું રાજ્ય છે જ્યાં 10 વર્ષથી વધારે જૂના ડીઝલ વાહનો અને 15 વર્ષથી વધુ જૂના પેટ્રોલ વાહનો આપોઆપ ડિરજિસ્ટર થઈ જાય છે અને પછી તેને સ્ક્રેપમાં કાઢવા પડે છે.
અત્યાર સુધીની વિગત પ્રમાણે 17 રાજ્યો અને કેન્દ્રશાસિત પ્રદેશોએ રોડ ટેક્સમાં 15 ટકા રાહતની જાહેરાત કરી છે. જૂના વાહનને સ્ક્રેપમાં કાઢીને તેની જગ્યાએ નવા વાહનનું રજિસ્ટ્રેશન કરાવવામાં આવે ત્યારે આ રાહત મળે છે. પ્રાઈવેટ વ્હીકલ્સની વાત કરવામાં આવે તો 12 રાજ્યો રોડ ટેક્સમાં 25 ટકા રિબેટ આપે છે. હરિયાણા 10 ટકા કન્સેશન અથવા સ્ક્રેપ વેલ્યૂના 50 ટકા સુધી રાહત આપે છે જ્યારે ઉત્તરાખંડ 25 ટકા સુધી રાહત અથવા રૂ. 50,000, બેમાંથી જે ઓછું હોય તેટલો ફાયદો આપે છે.
કર્ણાટક નવા પ્રાઈવેટ વ્હીકલના ભાવ પ્રમાણે રોડ ટેક્સમાં ફિક્સ્ડ રિબેટ આપે છે. ઉદાહરણ તરીકે 20 લાખથી વધારે ભાવના વાહનો પર 50,000 સુધી રિબેટ મળે છે. પોંડિચેરીમાં 25 ટકા કન્સેશન અથવા રૂ. 11,000 બેમાંથી જે ઓછું હોય તેટલી રાહત મળે છે.
