દંભ ને દેખાવનો છે દૌર મારા દેશમાં,
જળ વગરના વાદળાં ઘનઘોર મારા દેશમાં !
રાજવીના મુખવટામાં ચોર મારા દેશમાં,
કાગડાઓ થઇ ગયા છે મોર મારા દેશમાં !
એમની દક્ષિણા કાજે કઈ હદે એ જાય છે;
વ્યંઢળો પરણાવતાં છે ગોર મારા દેશમાં !
હું જ સારો, હું જ શાણો, હું જ સાચો, હું ખરો,
ચોતરફ “હું” “હું” નો કેવળ શોર મારા દેશમાં !
એક સાથે, શાંતચિત્તે , દેશ આખો , પ્રેમથી,
દેશની ખોદી રહ્યો છે ઘોર મારા દેશમાં !
મંદિરો ને મસ્જિદોનું લશ્કરો રક્ષણ કરે,
રામ અલ્લાહ કેટલા કમજોર મારા દેશમાં !
એક દિ તો ઉગશે ‘કાયમ’ હજુ વિશ્વાસ છે;
એક સુંદર ને સુન્હેરી ભોર મારા દેશમાં !
-કાયમ હઝારી