ગ્લોબલ વોર્મિંગની અસર દુનિયાભરમાં જોવા મળી રહી છે. ભારતમાં તો આપણે કાળઝાળ ગરમીનો અનુભવ કરી જ રહ્યા છીએ પરંતુ હવે તો દુનિયાના અન્ય દેશોમાં પણ તાપમાનનો પારો ઊંચે ચડી રહ્યો છે. સામાન્ય રીતે ઠંડા રહેતા યુરોપમાં હાલ ભયંકર ગરમી પડી રહી છે. બે અઠવાડિયા પહેલા જ વૈજ્ઞાનિકોએ ખુલાસો કર્યો હતો કે, આધુનિક વિશ્વના ઈતિહાસમાં પૃથ્વી પર સૌથી વધુ ગરમ દિવસો નોંધાઈ રહ્યા છે. પૃથ્વીના ઉત્તર ગોળાર્ધમાં હિટવેવ જોવા મળી રહી છે. ગરમી છોડતાં ગેસ, અશ્મિભૂત ઈંધણના વપરાશ તેમજ અલ નીનોની અસરના લીધે રેકોર્ડ બ્રેક ગરમી નોંધાઈ રહી છે.
મંગળવારે યુરોપના મોટાભાગના સ્થળોએ હીટવેવની અસર નોંધાઈ હતી. વિશ્વ હવામાન સંસ્થા (WMO)એ ચેતવણી આપી હતી કે, એશિયા અને અમેરિકા જેવા ખંડોમાં ભીષણ ગરમીના લીધે મૃત્યુઆંક વધી શકે છે. હાલ યુરોપમાં ઉનાળાની સીઝન ચાલી રહી છે અને આ દરમિયાન અહીં દુનિયાભરમાંથી પ્રવાસીઓ આવે છે. એવામાં WMOનું કહેવું છે કે, ઉત્તર ગોળાર્ધમાં હીટવેવની સ્થિતિ હજી પણ વકરી શકે છે. ગત વર્ષે ફક્ત યુરોપમાં જ હીટવેવના લીધે 61,000 લોકોના મોત થયા હતા. યુરોપિયન યુનિયનના ઈમર્જન્સી રિસપોન્સ કોઓર્ડિનેશન સેન્ટરે ઈટલી, સ્પેન, ક્રોએશિયા, સર્બિયા, બોસનિયા, હત્ઝિગોવના અને મોન્ટીનિગ્રોમાં તાપમાન વધવાની ચેતવણી આપતાં રેડ એલર્ટ આપ્યું છે.
કેલિફોર્નિયાની ડેથ વેલીમાં ચાલુ વર્ષે તાપમાનનો પારો 53 ડિગ્રી સેલ્સિઅસ પર પહોંચ્યો હતો, જ્યારે ચીનના નોર્થવેસ્ટમાં પારો 52 ડિગ્રી સેલ્સિઅસથી વધુ હતો. ઉપરાંત ગ્રીસથી માંડીને સ્વીસ આલ્પ્સના જંગલોમાં આગ લાગી હતી અને સાઉથ કોરિયામાં વિનાશક પૂર આવ્યું હતું. WMOએ જણાવ્યું, “હીટવેવની અસર વધી રહી હોવાથી આ અઠવાડિયે મોટાભાગના દિવસોમાં નોર્થ અમેરિકા, એશિયા તેમજ નોર્થ આફ્રિકા અને મેડિટેરિયન દેશોમાં તાપમાનનો પારો 40 ડિગ્રી સેલ્સિઅસથી વધારે રહેશે. એટલું જ નહીં લઘુત્તમ તાપમાનમાં પણ એકાએક ખૂબ વધારો જોવા મળશે જેના લીધે હાર્ટ અટેક અને મૃત્યુની સંખ્યા વધી શકે છે.”
ઈટલી અને સ્પેનમાં તો ગરમીના કારણે લોકોના હાલ બેહાલ છે. અહીં ત્રણ પ્રદેશોને રેડ એલર્ટ પર મૂકવામાં આવ્યા છે. આખા ખંડમાં તાપમાનનો પારો 48.8 ડિગ્રીને પાર ગયો છે એવામાં ઈટલીના ટાપુઓ સાડિનિયા અને સિસલીમાં હજી પણ તાપમાન ઓછું છે. ઓગસ્ટ 2021માં સિસલીમાં 48.8 ડિગ્રી તાપમાન નોંધાયું હતું. ગ્રીસની રાજધાની એથેન્સના વેરવેરોહોરિયા (Dervenohoria)ના જંગલ ઉપર ધુમાડાનો ગોટો જોવા મળ્યો હતો. એથેન્સની આસપાસના કેટલાય વિસ્તારોમાં લાગેલી આગ પૈકીની આ એક છે અને હજી પણ ઓલવાઈ નથી. ગુરુવારે 44 ડિગ્રી તાપમાન રહેવાનું અનુમાન છે અને હીટવેવની આગાહી કરવામાં આવી છે ત્યારે ફાયર વિભાગના પ્રવક્તાએ તેને વધુ એક મુશ્કેલ દિવસ ગણાવ્યો હતો.
