લખનઉઃ UPના મુખ્યમંત્રી યોગી આદિત્યનાથને ફરી એકવાર જાનથી મારી નાખવાની ધમકી મળી છે. યુપી 112 પર કોઈએ આ ધમકી આપી છે. ઓપરેશન કમાન્ડર યુપી 112એ સોમવારે મોબાઈલ નંબરના આધારે સુશાંત ગોલ્ફ સિટી પોલીસ સ્ટેશનમાં રિપોર્ટ નોંધાવ્યો છે. ઈન્સ્પેક્ટર સુશાંત ગોલ્ફ સિટી શૈલેન્દ્ર ગિરીએ જણાવ્યું કે જે મોબાઈલ નંબર પરથી ધમકી આપવામાં આવી હતી, તેના આધારે રિપોર્ટ નોંધીને આરોપીને શોધી કાઢવામાં આવી રહ્યો છે. આ પહેલીવાર નથી જ્યારે સીએમ યોગીને જાનથી મારી નાખવાની ધમકી મળી હોય.
અજાણ્યા શખસે આપી ધમકી
રાજ્યના મુખ્યમંત્રી યોગી આદિત્યનાથને રવિવારે સાંજે શહીદ પથ સ્થિત UP 112ના હેડક્વાર્ટરના વોટ્સએપ નંબર પર જાનથી મારી નાખવાની ધમકી આપવામાં આવી હતી. કોમ્યુનિકેશન ઓફિસર શિખા અવસ્થીએ મેસેજનો સ્ક્રીન શોટ લીધો હતો.
FIR અનુસાર, CM યોગીને 23 એપ્રિલે રાત્રે 8.22 વાગ્યે UP 112 હેડક્વાર્ટરમાં સોશિયલ મીડિયાના વોટ્સએપ ડેસ્ક પર ધમકીભર્યો સંદેશ મળ્યો હતો. આ મેસેજમાં લખવામાં આવ્યું હતું- ‘હું બહુ જલ્દી સીએમ યોગીને મારી નાખીશ’. મુખ્યમંત્રીને ધમકીની માહિતી મળતા જ તપાસ એજન્સીઓ એલર્ટ થઈ ગઈ છે.
ગત વર્ષે એપ્રિલમાં પણ ધમકીઓ મળી હતી
તમને જણાવી દઈએ કે આ પહેલા ગયા વર્ષે એપ્રિલમાં કોઈએ યોગી આદિત્યનાથને મારી નાખવાની ધમકી આપી હતી. આ પછી લખનઉના સાયબર સેલે રાજસ્થાનના મેવાતમાંથી સરફરાઝ નામના યુવકની ધરપકડ કરી હતી. તેણે યુપી 112ના વોટ્સએપ ડેસ્ક પર ધમકીભર્યો મેસેજ પણ મોકલ્યો હતો.
બોમ્બ બ્લાસ્ટની ધમકી પણ મળી ચૂકી છે
આ મામલામાં લખનઉના સુશાંત ગોલ્ફ સિટી પોલીસ સ્ટેશનમાં એફઆઈઆર નોંધવામાં આવી હતી. આ પહેલા સીએમ યોગીને બોમ્બથી ઉડાવી દેવાની ધમકી મળી હતી. લખનઉના આલમબાગ વિસ્તારના રહેવાસી દેવેન્દ્ર તિવારીના ઘરેથી એક બેગ મળી આવી હતી. આ બેગમાં એક પત્ર રાખવામાં આવ્યો હતો, જેમાં યોગીને બોમ્બથી ઉડાવી દેવાની ધમકી લખવામાં આવી હતી.
