નીતુ કપૂરનો આજે આઠ જુલાઈના રોજ 62મો જન્મદિવસ છે. નીતુ કપૂરની દીકરી રિદ્ધિમાએ સોશિયલ મીડિયામાં માતા તથા ભાઈ સાથેની એક પોસ્ટ શેર કરી હતી. આ ઉપરાંત રિદ્ધિમાએ ઈન્સ્ટાગ્રામ સ્ટોરીમાં પણ સેલિબ્રેશનની તસવીરો શેર કરી હતી.
તસ્વીરમાં નીતુ સિંહ બ્લેક આઉટફિટમાં, રિદ્ધિમા વ્હાઈટ તથા રણબીર ગ્રીન શર્ટમાં જોવા મળ્યો હતો. રિદ્ધિમાએ તસવીર શેર કરીને કહ્યું હતું, આયર્ન લેડીને જન્મદિવસની શુભેચ્છા. બહુ બધો પ્રેમ.
1966માં ફિલ્મ ‘સૂરજ’માં નીતુ સિંહે ચાઈલ્ડ આર્ટિસ્ટથી પોતાના કરિયરની શરૂઆત કરી હતી. આ ફિલ્મમાં વૈજયંતીમાલા તથા રાજેન્દ્ર કુમાર લીડ રોલમાં હતાં. ત્યારબાદ નીતુ સિંહે ‘દસ લાખ’, ‘વારિસ’, ‘દો કાલિયાં’ જેવી ફિલ્મમાં કામ કર્યું હતું. નીતુએ 1973માં લીડ એક્ટ્રેસ તરીકે ‘રીક્ષાવાલા’થી કરિયરની શરૂઆત કરી હતી. જોકે, નીતુ સિંહને ખરી ઓળખ ‘યાદો કી બારાત’ ફિલ્મથી મળી હતી.