છોટાઉદેપુર જિલ્લાના પાવીજેતપુર તાલુકાના વિરપુર ગામે બે દિવસ પહેલા એક બાળકી ઉપર દીપડાએ હુમલો કર્યો હતો જેને આખરે પકડવામાં સફળતા સાંપડી છે. વનવિભાગ ટીમના પ્રયાસ બાદ દીપડો આજે પાંજરે પુરાયો હોવાની વહેતી થયેલી વાતોના પગલે સ્થાનિક લોકોએ રાહતનો દમ લીધો હતો. પ્રાપ્ત માહિતી અનુસાર બે દિવસ પહેલા પાવી જેતપુર તાલુકાના વીરપુર ગામમાં સાંજના સમયે બાળકી રમીલા લઘુશંકા કરવા ગઈ હતી, તે સમયે બાજુના મકાઈના ખેતરમાં છુપાઈને બેઠેલો દીપડો ૧૦ વર્ષીય બાળકી રમીલાને ગળાના ભાગેથી પકડીને ઉઠાવીને લઇ ગયો હતો. બાળકીએ બુમાબુમ કરતા તેના પિતા મંગાભાઈ દિપડાની પાછળ દોડ્યા હતા, તેઓએ બાળકીને દીપડાના મોંમાંથી છોડાવી હતીે પરંતુ બાળકી ગંભીર રીતે ઇજાગ્રસ્ત થઈ હતી જેથી તેને સારવાર માટે વડોદરા રિફર કરવી પડી હતી.
દીપડાના આ હુમલાથી ઉંઘમાંથી જાગેલા જંગલ ખાતાએ તાત્કાલિક આદમખોર દીપડાને પકડવા માટે કેમેરા અને પીંજરું વીરપુર ખાતે મૂક્યું હતું જેમાં ગઈકાલે સાંજે દીપડો વન વિભાગના પિંજરામાં પુરાઈ ગયો હતો.
(તસવીર / અહેવાલ :- ઈમરાન મનસુરી, બોડેલી)