રવિવારે ટીમ ઈન્ડિયાએ ન્યૂઝિલેન્ડ સામે રમાયેલી નિર્ણાયક ટી૨૦ મેચ ૪ રને હારવાની સાથે જ સીરિઝ ૧-૨થી ગુમાવી હતી. પરંતુ ચાઇનામેન કુલદીપ યાદવે તેના પ્રદર્શનથી આઈસીસી રેંકિંગમાં નવી ઊંચાઈ હાંસલ કરી છે.
હેમિલ્ટનમાં રમાયેલી અંતિમ ટી૨૦માં કુલદીપ યાદવે ૨૬ રનમાં ૨ વિકેટ લીધી હતી.જેના કારણે ૨૪ વર્ષીય સ્પિનર એક સ્થાનના ફાયદા સાથે ટી૨૦ બોલર્સના આઈસીસી રેંકિંગમાં બીજા સ્થાન પર આવી ગયો છે. કુલદીપના ૭૨૮ પોઇન્ટ છે, જ્યારે અફઘાનિસ્તાનનો ૨૦ વર્ષીય લેગ સ્પિનર રાશિદ ખાન ૭૯૩ પોઇન્ટ સાથે ટોચના ક્રમે છે.ટોપ ૧૦માં ભારતનો અન્ય કોઈ બોલર નથી. કુલદીપનો સ્પિન જોડીદાર યુઝવેન્દ્ર ચહલ ૬ ક્રમ ગબડીને ૧૭માં સ્થાન પર છે, જ્યારે ભુવનેશ્વર કુમાર ૧૮માં સ્થાન પર છે. બીજી તરફ ડાબોડી સ્પિનર કૃણાલ પંડ્યાએ ૩૯ સ્થાનના કૂદકા સાથે કરિયર બેસ્ટ ૫૮મું રેંકિંગ મેળવ્યું છે.