જો તમે અમદાવાદની શેરીઓમાં ફરી રહ્યા છો અથવા તો કોઈ હોટલમાં જાવ અને ત્યાં તમને વિદેશી ચહેરાઓ જોવા મળે, તો નવાઈ ના પામતા! છેલ્લા કેટલાક મહિનામાં અમદાવાદમાં આંતરરાષ્ટ્રીય પ્રવાસીઓ એટલે કે ઈન્ટરનેશનલ પેસેન્જર્સનો ધસારો વધી ગયો છે. ચોક્કસ આંકડામાં કહીએ તો તેમાં 30%નો વધારો જોવા મળ્યો છે. આ વર્ષે એપ્રિલથી ઓક્ટોબર સુધીમાં અમદાવાદના સરદાર વલ્લભભાઈ પટેલ ઈન્ટરનેશનલ (SVPI) એરપોર્ટ પરથી લગભગ 10.61 લાખ આંતરરાષ્ટ્રીય મુસાફરોએ મુસાફરી કરી હતી. ગયા વર્ષના સમાન સમયગાળામાં આ સંખ્યા 8.19 લાખ હતી. આમ આ બંનેની સરખામણી કરવામાં આવે તો આંતરરાષ્ટ્રીય મુસાફરોની સંખ્યામાં 30%નો વધારો થયો છે, તેમ એરપોર્ટ ઓથોરિટી ઓફ ઈન્ડિયા (AAI)ના ડેટા દર્શાવે છે.
એરપોર્ટ પર 18, 19 અને 20 નવેમ્બરના રોજ સતત ત્રણ દિવસ સુધી રેકોર્ડ એક-દિવસીય પેસેન્જર ટ્રાફિક જોવા મળ્યો હતો. 20 નવેમ્બરના રોજ SVPIA ખાતે પેસેન્જર ટ્રાફિક 42,224 હતો, જેનું મુખ્ય કારણ ક્રિકેટ વર્લ્ડ કપની ફાઈનલ અહીં યોજાઈ રહી હતી. પ્રાઈમરી ફોરેન પેસેન્જર ટ્રાફિક દુબઈ, અબુધાબી, કુવૈત, શારજાહ સહિતના ગલ્ફ દેશોમાંથી હતો. ત્યારબાદ સિંગાપોર, થાઈલેન્ડ અને યુકે (લંડન)નો સમાવેશ થાય છે. ઉનાળા અને દિવાળીની રજાઓ દરમિયાન વિદેશ પ્રવાસના બુકિંગમાં પણ વર્ષ દરમિયાન વધારો જોવા મળ્યો હતો.
