તાજેતરમાં પાંચ રાજ્યોની વિધાનસભા ચૂંટણીમાં ભાજપને ત્રણ રાજ્યોમાં વિજય મળતા પાર્ટીનો જુસ્સો જોરદાર વધી ગયો છે અને હવે વર્ષ 2024ની લોકસભા ચૂંટણીમાં અગાઉ કરતા પણ વધુ સારો દેખાવ કરવાનો ટાર્ગેટ રાખ્યો છે. ભાજપે આગામી લોકસભા ચૂંટણીમાં આખા દેશમાંથી કુલ 35 કરોડ વોટ મેળવવાનો લક્ષ્ય રાખ્યો છે. 2019ની ચૂંટણીમાં ભાજપને 22 કરોડ મત મળ્યા હતા અને હવે તે 13 કરોડ વધારે મત મેળવવાનો ટાર્ગેટ ધરાવે છે.
ભાજપ તેની સ્ટ્રેટેજીમાં હંમેશા નવા ફેરફાર કરવા માટે જાણીતું છે અને ડેટાનું એનાલિસિસ એટલું સજજડ હોય છે કે વિરોધીઓને કોઈ ચાન્સ મળતો નથી. 2024માં થનારી ચૂંટણી માટે ભાજપે પાયાનું કામ ક્યારથી શરૂ કરી દીધું છે. તાજેતરમાં વિધાનસભાની ચૂંટણીઓ તેના માટે ટ્રાયલ રન હતી તેમ કહી શકાય.
આગામી લોકસભાની ચૂંટણીમાં ભાજપે ગુજરાત, રાજસ્થાન, મધ્ય પ્રદેશ, ઉત્તર પ્રદેશ જેવા રાજ્યોમાં સોલિડ વોટ મળે તેવી શક્યતા જોવામાં આવે છે, પરંતુ કેટલાક રાજ્યો તેની ગેમ બગાડી શકે છે. આવા રાજ્યોમાં પ. બંગાલ, મહારાષ્ટ્ર અને કર્ણાટકનો સમાવેશ થાય છે. ભાજપ કદાચ તેનો 28 ટકા વોટ શેર જાળવી રાખશે પરંતુ કેટલાક વોટ શેરને છેલ્લે સુધી મેનેજ કરી શકાશે તે કહેવું મુશ્કેલ છે. 2019ની ચૂંટણીમાં ભાજપે કર્ણાટકમાં 51.4 ટકા વોટ શેર જાળવી રાખ્યો હતો અને જેડી (એસ) – કોંગ્રેસના ગઠબંધનને 41 ટકા વોટ શેર મળ્યો હતો. રાજ્યમાં કુલ 28માંથી 26 સીટ પર ભાજપનો વિજય થયો અને હાલના કોંગ્રેસ પ્રમુખ મલ્લિકાર્જુન ખડગે પણ પોતાની સીટ હારી ગયા હતા.