છેલ્લા ઘણાં સમયથી અમેરિકાના વિઝા મળવામાં વિલંબ થઈ રહ્યો છે. એમાંય કોરોના કાળ પછી યુએસ વિઝાની પ્રોસેસિંગ અને અપોઈન્ટમેન્ટ મળવામાં ખૂબ સમય લાગી રહ્યો છે. થોડા વખત પહેલા જ અમેરિકાએ આ બાબતની નોંધ લેતાં ભારતીયોની વિઝા પ્રોસેસ ઝડપી બનાવવાની બાંહેધરી આપી હતી. જેનું પરિણામ હવે મળતું દેખાઈ રહ્યું છે. યુએસ જવાની રાહ જોઈને બેઠેલા ભારતીય વિદ્યાર્થીઓ અને વિઝિટર્સને ટૂંક સમયમાં જ વિઝા અપોઈન્ટમેન્ટના સ્લોટ વધુ મળશે અને પ્રોસેસિંગ સેન્ટરની સંખ્યા પણ વધશે કારણકે વેઈટિંગ પીરિયડ ઘટાડવા માટે યુએસ કોન્સ્યુલેટે પ્રયત્નો શરૂ કર્યા છે. મુંબઈમાં ફરજ બજાવતા યુએસ કાઉન્સલ જનરલ માઈક હેન્કીએ અમારા સાથી અખબાર ટાઈમ્સ ઓફ ઈન્ડિયાને આપેલા ઈન્ટરવ્યૂમાં આ અંગે વિગતવાર માહિતી આપી છે.
હૈદરાબાદમાં શરૂ કરાયેલા યુએસ કોન્સ્યુલેટમાં સ્ટાફની પૂર્ણ સંખ્યામાં ભરતી કરવામાં આવશે. જે બાદ રોજની લગભગ 3500 વિઝા અરજી પ્રોસેસ થઈ શકશે. આ સાથે જ હૈદરાબાદનું વિઝા કોન્સ્યુલેટ એશિયાનું સૌથી મોટું પ્રોસેસિંગ કોન્સ્યુલેટ બની જશે. બે નવા કોન્સ્યુલેટ અમદાવાદ અને બેંગાલુરુમાં પણ શરૂ થઈ રહ્યા છે તેમ હેન્કીએ જણાવ્યું.
ભારતીય વિદ્યાર્થીઓ માટેની વિઝા પ્રોસેસને સુવ્યવસ્થિત કરવામાં આલી રહી છે. “અમે સ્ટુડન્ટ વિઝાને પ્રાથમિકતા આપી રહ્યા છીએ અને વિદ્યાર્થીઓનું ભણવાનું શરૂ થઈ જાય એ પહેલા તેમને વિઝા ઈન્ટરવ્યૂની તારીખ મળી જાય એ સુનિશ્ચિત કરી રહ્યા છીએ. અમે ગયા વર્ષે આ પ્રક્રિયા શરૂ કરી હતી અને ચાલુ વર્ષે પણ તેને વળગી રહ્યા છીએ”, તેમ હેન્કીએ ઉમેર્યું.
બિઝનેસની દ્રષ્ટિએ બંને દેશો વચ્ચેના સંબંધ વિશે વાત કરતાં માઈક હેન્કીએ કહ્યું, “યુએસ અને ભારતના દ્વિપક્ષીય સંબંધો અત્યારે ખૂબ સારા છે. વિદ્યાર્થીઓ અને બિઝનેસના કારણે જ બંને દેશોના લોકો વચ્ચેના સંબંધો વધુ સારા થઈ રહ્યા છે. મને બિઝનેસ ગ્રોથ થતો દેખાય છે.” ઉલ્લેખનીય છે કે, હાલમાં જ સામે આવ્યું હતું કે, અમેરિકાએ છેલ્લા એક વર્ષમાં 1,40,000 ભારતીય વિદ્યાર્થીઓને વિઝા આપ્યા છે. ઓક્ટોબર 2022થી સપ્ટેમ્બર 2023 વચ્ચે 1,40,000 સ્ટુડન્ટ વિઝા ઈશ્યૂ કર્યા હતા.