15મી જૂને ગુજરાતના દરિયાકિનારે બિપોરજોય વાવાઝોડું (Cyclone Biparjoy) ત્રાટક્યું હતું અને આ સાથે રાજ્યમાં ચોમાસાની શરૂઆત થઈ છે. 11થી 18 જૂન તેમ માત્ર એક અઠવાડિયામાં ગુજરાતમાં સીઝનનો 19 ટકા જ્યારે સૌરાષ્ટ્ર-કચ્છમાં 39 ટકા વરસાદ નોંધાયો હતો. ભારતીય હવામાન વિભાગ (આઈએમડી) ગુજરાતના હેડ મનોરમા મોહંતીએ જણાવ્યું હતું કે, ‘અત્યંત તીવ્ર ચક્રવાતી વાવાઝોડું બિપોરજોય લેન્ડફોલ પહેલા, તે દરિયમાન અને બાદમાં ખાસ કરીને કચ્છ, દેવભૂમિ દ્વારકા, પાટણ અને જામનગર જેવા ક્ષેત્રોમાં વરસાદ લઈને આવ્યું હતું. સોમવાર સુધીમાં રાજ્યમાં 18.7 ટકા વરસાદ થયો છે, જ્યારે સૌરાષ્ટ્ર-કચ્છ ક્ષેત્રમાં 38.8 ટકા મોસમી વરસાદ થયો છે. લેન્ડફોલ બાદ ઉત્તર ગુજરાતના વિસ્તારોમાં વરસાદ યથાવત્ છે’.
મનોરમા મોહંતીએ ઉમેર્યું હતું કે, ‘ગુજરાત તરફ દક્ષિણ-પશ્ચિમ ચોમાસું આગળ વધવાની રાહ જોવાઈ રહી છે. સોમવારે દક્ષિણ પશ્ચિમ ચોમાસાએ દક્ષિણ ભારતના કેટલાક વધુ ભાગોને આવરી લીધા હતા. તેની ઉત્તરીય સીમા દક્ષિણ મહારાષ્ટ્ર સુધી પહોંચી ગઈ છે’. આ ક્ષેત્રો માટે રોલ રિવર્સલ છે. આઈએમડીના ડેટા દર્શાવે છે કે, દક્ષિણ ગુજરાતના તમામ જિલ્લાઓમાં વરસાદની અછત છે, જ્યારે કચ્છ અને સૌરાષ્ટ્રના મોટાભાગના ભાગોમાં અતિશય વરસાદ થયો છે. સામાન્ય રીતે, ચોમાસુ દક્ષિણ ગુજરાતથી પ્રવેશે અને બાદમાં ધીમે-ધીમે આખા રાજ્યને આવરે છે. દક્ષિણ ગુજરાતમાં પણ પરંપરાગત રીતે સૌથી વધુ વરસાદ પડે છે.