દિલ્હીના સીએમ અરવિંદ કેજરીવાલની આમ આદમી પાર્ટી (AAP)ને રાષ્ટ્રીય પાર્ટીનો દરજ્જો મળ્યો છે. ચૂંટણી પંચે સોમવારે સાંજે આની જાહેરાત કરી હતી. ઉપરાંત, પંચે જણાવ્યું કે તૃણમૂલ કોંગ્રેસ (TMC), CPI અને શરદ પવારની NCP હવે રાષ્ટ્રીય પક્ષો નથી. તમને જણાવી દઈએ કે થોડા દિવસો પહેલા આમ આદમી પાર્ટી (AAP) એ રાષ્ટ્રીય પાર્ટી તરીકે માન્યતા મેળવવા માટે કર્ણાટક હાઈકોર્ટમાં અરજી કરી હતી. આ અરજીમાં કહેવામાં આવ્યું હતું કે વિલંબના કારણે તેમની ચૂંટણી લડવાની ક્ષમતામાં અવરોધ આવી રહ્યો છે.
ઉલ્લેખનીય છે કે, AAP દિલ્હી અને પંજાબમાં શાસન કરે છે અને ગોવામાં વિધાનસભાના બે સભ્યો (ધારાસભ્યો) છે. રાષ્ટ્રીય પક્ષ બનવા માટે તેને ગુજરાતમાં ઓછામાં ઓછી બે બેઠકો અને 6% વોટ શેરની જરૂર હતી. AAPએ ગુજરાત વિધાનસભાની ચૂંટણીમાં 12.9% વોટ શેર સાથે પાંચ બેઠકો જીતી હતી. કેજરીવાલે પાર્ટીના તમામ સમર્થકો અને સ્વયંસેવકોને અભિનંદન પાઠવ્યા હતા. તેમણે કહ્યું કે, આમ આદમી પાર્ટીનો સમય આવી ગયો છે. ભારતનો સમય આવી ગયો છે, દિલ્હીના મુખ્ય પ્રધાને પાર્ટી દ્વારા પોસ્ટ કરેલા ટ્વિટમાં જણાવ્યું હતું.
ચૂંટણી પંચે NCP, CPI અને TMCને રાષ્ટ્રીય પક્ષો તરીકે માન્યતા રદ કરતા હવે ભાજપ, કોંગ્રેસ, CP, બહુજન સમાજ પાર્ટી (BSP), નેશનલ પીપલ્સ પાર્ટી (NPP) અને AAP રાષ્ટ્રીય પક્ષો છે. કમિશને ત્રણેય પક્ષોને કારણદર્શક નોટિસ પાઠવી હતી અને તેમને પૂછ્યું હતું કે 2019ની લોકસભા ચૂંટણીમાં તેમના પ્રદર્શનને પગલે તેઓને રાષ્ટ્રીય પક્ષો તરીકે કેમ માન્યતા રદ ન કરવી જોઈએ.
