ભોજપૂરી ફિલ્મ ઈન્ડસ્ટ્રીમાંથી એક ઘણા જ શોકિંગ સમાચાર આવી રહ્યા છે. એક્ટ્રેસ આકાંક્ષા દુબે (Bhojpuri Actress Akanksha Dubey)એ આત્મહત્યા કરી લીધી છે. જણાવાઈ રહ્યું છે કે, ગત રાત્રે 25 (માર્ચ) આકાંક્ષા દુબે વારાણસીની એક હોટલમાં રોકાઈ હતી અને ત્યાં આત્મહત્યા કરી લીધી હતી. હાલ પોલીસ મામલાની તપાસ કરી રહી છે.
હાલના સમયમાં ફિલ્મ ઈન્ડસ્ટ્રી પર મોત ભમી રહ્યું છે. સાઉથ ફિલ્ડ ઈન્ડસ્ટ્રીથી લઈને બોલીવૂડ અને હવે ભોજપૂરી સિનેમામાં સેલેબના મોત થયા છે. ગત દિવસોમાં બોલીવૂડ એક્ટર-ડાયરેક્ટર સતીશ કૌશિક અને તાજેતરમાં જ નીલૂ કોહલીના પતિ ઉપરાંત ડાયરેક્ટર પ્રદીપ સરકારના મોતે દરેકને હચમચાવી નાખ્યા છે. લોકો એક પછી એક મળી રહેલા આ આઘાતમાંથી હજુ બહાર નથી આવ્યા કે, હવે આકાંક્ષા દુબેની આત્મહત્યાના સમાચારે બધાને ચોંકાવી દીધા છે.
જણાવાઈ રહ્યું છે કે, 25 વર્ષની આકાંક્ષા દુબેએ વારાણસીની સારનાથ હોટલમાં આત્મહત્યા કરી લીધી છે. તે વારાણસીમાં જ પોતના એક પ્રોજેક્ટનું શૂટિગં કરી રહી હતી. આકાંક્ષાએ આ પગલું કેમ ભર્યું તે અંગે હજુ કોઈ નક્કર માહિતી સામે આવી નથી.
આકાંક્ષા દુબેનો જન્મ 1997માં થયો હતો. તે ઉત્તર પ્રદેશના ભદોહી તાલુકાના પરસીપુરની રહેવાસી હતી. તેણે ‘મેરી જંગ મેરા ફેસલા’, ‘મુઝસે શાદી કરોગી’ અને ‘સાજન’ જેવી ફિલ્મો કરી હતી, જે હિટ રહી હતી. જે દિવસે આકાંક્ષાનું મોત થયું. તેના થોડા કલાકો બાદ તેનું પવન સિંહ સાથે છેલ્લું ગીત ‘આરા કભી હારા નહી’ રિલીઝ થયું છે. ફેન્સને હજુ વિશ્વાસ નથી આવી રહ્યો કે, જે એક્ટ્રેસ થોડા કલાકો પહેલા સુધી ઈન્સ્ટાગ્રામ પર વિડીયો શેર કરી રહી હતી અને શૂટિંગ કરી રહી હતી, તેણે અચાનક જ આવું પગલું પગલું કેમ ભરી લીધું?
આકાંક્ષાના મેકઅપ આર્ટિસ્ટ રેખા મોર્યાએ જણાવ્યું કે, ‘તેની પર્સનલ લાઈફમાં શું ચાલી રહ્યું હતું તે અંગે અમે જણાવી શકીએ તેમ થી, કેમકે એ બધું અમને જણાવાતું નથી.’ રેખાએ કહ્યું કે, આકાંક્ષા ઘણી હસમુખ હતી. બધાનું ધ્યાન રાખતી હતી. રેખાએ જણાવ્યું કે, તે વારાણસીની જ રહેવાસી છે એટલે જ્યારે કામ ન હોય ત્યારે હોટલમાં નથી રોકાતી પરંતુ પોતાના ઘરે જતી રહે છે. તેણે જણાવ્યું કે, શૂટિંગ માટે સેટ પતી કોલ આવ્યો કે, આકાંક્ષા ફોન નથી ઉઠાવી રહી, તો તમે આવી જાવ અને મેમને તૈયાર કરીને લાવો. જ્યારે તે હોટલ પર આવી તો રૂમનો દરવાજો અંદરથી બંધ હતો. તેણે દરવાજો ઘણી વખત ખખડાવો, પરંતુ દરવાજો ખૂલ્યો નહીં. રેખાએ જણાવ્યું કે, ગત રાત્રે તેની આકાંક્ષા સાથે વાત થઈ હતી. તે પોતાના દોસ્તની બર્થ-ડે પાર્ટીમાં ગઈ હતી. જોકે, આ પાર્ટીને લઈને તેણે વધુ માહિતી આપી ન હતી.
હોટલ સોમેન્દ્રમાંથી પોલીસને જાણ કરવામાં આવી હતી કે, રૂમ નંબર 5માં એક મહિલાએ આત્મહત્યા કરી લીધી છે. આ માહિતી મળતા પોલીસે ત્યાં પહોંચી તપાસ શરૂ કરી હતી. પોલીસે જણાવ્યું કે, પ્રાથમિક તપાસમાં આ આત્મહત્યા લાગી રહી છે. હાલ સુસાઈડ નોટ નથી મળી. આકાંક્ષા 22 માર્ચ, 2023એ આ હોટલમાં આવી હતી અને અહીં નજીકમાં જ શૂટિંગ કરી રહી હતી.
