લોકરક્ષક દળના પેપર લીક કરવાના કૌભાંડમાં વડોદરા મ્યુનિસિપલ કોર્પોરેશનના કોન્ટ્રાકટ કર્મચારી યશપાલસિંહ સોલંકીની સૌથી મોટી ભૂમિકા સામે આવી છે. દિલ્હીની લીંકવાળા કાવતરાખોરે યશપાલસિંહને પાંચ લાખ રૂપિયામાં પેપર અને જવાબો આપ્યા હતા. દિલ્હીથી રાતોરાત ફલાઇટ મારફતે વડોદરા આવી યશપાલસિંહે મનહર પટેલ અને જયેશ પટેલ સહિતના આરોપીઓ મારફતે પેપર લીકની ચેઇન આગળ ચલાવી હતી. લોકરક્ષક દળ પેપર લીક કૌભાંડનો રેલો દિલ્હી સુધી પહોંચ્યો છે ત્યારે આ સમગ્ર કૌભાંડમાં હજુ વધુ ધરપકડો થવાની પૂરી સંભાવના છે. લોકરક્ષક દળની પરીક્ષાનું પેપર લીક થવાના ચકચારભર્યા પ્રકરણમાં વડોદરા મહાનગરપાલિકાના(વીએમસી) સેનેટરી વિભાગમાં કોન્ટ્રાક્ટ પર કામ કરતા યશપાલસિંહ સોલંકીનું નામ ખુલ્યું છે. કોન્ટ્રાક્ટ પર હોવા છતાં યશપાલસિંહ રાજકીય ઘેરોબો ધરાવતો હોવા સહિતની ચોંકાવનારી વિગતો સામે આવી રહી છે. જો કે, પેપર લીકનો ભાંડો ફૂટ્યો ત્યારથી યશપાલ ભૂગર્ભમાં ઉતરી ગયો છે. એટલું જ નહીં, યશપાલના મહિસાગર જિલ્લાના લુણાવાડાના છાપરી મુવાડા ગામ સ્થિત ઘરે પણ તાળાં લાગ્યાં છે. યશપાલસિંહ તા.૧ લી ડિસેમ્બરે જ દિલ્હી જઇ રાતોરાત પેપર અને જવાબો લઇને દિલ્હીથી ફલાઇટમાં વડોદરા પરત આવી ગયો હતો. દરમ્યાન આ સમગ્ર પ્રકરણ અને યશપાલસિંહની ભૂમિકા મામલે વડોદરા મ્યુનિસિપલ કમિશ્નરે જણાવ્યું હતું કે, યશપાલસિંહ સોલંકી અંગે પોલીસ તરફથી અમને માહિતી મળશે, ત્યારબાદ કાયદાકીય કાર્યવાહી કરવામાં આવશે.
પાછલી પોસ્ટ
