નોર્થ કોરિયામાં લાંબા અંતરના રોકેટ સાઇટના પુનઃનિર્માણની સુચના બાદ અમેરિકાના પ્રેસિડન્ટ ડોનાલ્ડ ટ્રમ્પે પ્રતિક્રિયા આપી છે. પ્રેસિડન્ટ ટ્રમ્પે કહ્યું કે, નોર્થ કોરિયાના નેતા કિમ જોંગ ઉનનું આ પગલું અત્યંત નિરાશાજનક છે. ટ્રમ્પ અને કિમ જોંગની ૨૭-૨૮ ફેબ્રુઆરીના રોજ વિયેતનામની રાજધાની હનોઇમાં બીજી સમિટ યોજાઇ હતી, જે નિષ્ફળ રહી હતી. નોર્થ કોરિયાના આ પગલાંને તેની સાથે જોડીને જોવામાં આવી રહ્યું છે.
પત્રકારો સાથે વાત કરતા ટ્રમ્પે કહ્યું કે, જો નોર્થ કોરિયામાં રોકેટ સાઇટના પુનઃનિર્માણની જાણકારી સાચી સાબિત થઇ તો આ અમેરિકા માટે ગંભીર ચિંતાનો વિષય છે. આ અમેરિકા માટે એક ચેતવણી હશે, તેમ છતાં આ અંગે કંઇ પણ કહેવું ઉતાવળ પણ ગણાશે. અમેરિકાના રાષ્ટ્રીય સુરક્ષા સલાહકાર જ્હોન બોલ્ટને કહ્યું કે, જો પ્યોંગયાંગ પોતાના પરમાણુ કાર્યક્રમો બંધ નહીં કરે તો અમેરિકા પોતાના પ્રતિબંધો વધુ કડક બનાવશે.