બુલંદશહેર હિંસા અને પોલીસ ઇન્સપેકટર સુબોધ કુમાર સિંહની હત્યા મામલે તપાસ કરી રહેલી યુપી પોલીસની એસઆઇટીએ કોર્ટમાં ચાર્જશીટ દાખલ કરી છે. બુલંદશહેરની કોર્ટ સોમવારે આ ચાર્જશીટને ધ્યાનમાં લઇ શકે છે. યુપી પોલીસે જણાવ્યું હતું કે, આ ચાર્જશીટમાં ૩૮ લોકોના નામ સામેલ છે, જેમાંથી પાંચ લોકો સુબોધ કુમારની હત્યાના આરોપી છે.
પોલીસે દાવો કર્યો હતો કે, આ પાંચ લોકોના ટોળાએ ઇન્સપેક્ટર સિંહને ઘેરી લીધા હતા અને ત્યારબાદ ટોળામાંથી એક શખ્સે તેમને ગોળી મારી દીધી હતી. યુપી પોલીસે જણાવ્યું હતું કે, બજરંગ દળના નેતા અને આ હત્યાના પ્રમુખ આરોપીઓમાંથી એક યોગેશ રાજ પર રમખાણો અને ત્યારબાદ આગ ચાંપવાનો આરોપ લગાવવામાં આવ્યો છે. જો કોર્ટ સોમવારે પોલીસની ચાર્જશીટને ધ્યાનમાં લે છે તો આ મામલે ટ્રાયલ શરૂ થઇ જશે.
ઉલ્લેખનીય છે કે, ઉત્તરપ્રદેશના બુલંદશહેરમાં કથિત ગૌહત્યાના મામલે હિંસક પ્રદર્શન થયા હતા આ હિંસા દરમિયાન પોલીસ અને સામાન્ય પ્રજા વચ્ચે ભીષણ સંઘર્ષ થયો હતો. જે દરમિયાન વિસ્તારના ઈન્સ્પેક્ટર સુબોધ સિંહની ગોળી મારી હત્યા કરવામાં આવી હતી.
