અભિનેત્રી પ્રિયંકા ચોપડાની પહેલી હોલિવૂડ ફિલ્મ બેવોચને ભારતીય સેન્સર બોર્ડે એ સર્ટિફિકેટ આપ્યું છે. સેન્સર બોર્ડે ફિલ્મમાં દર્શાવાયેલાં સ્વિમસ્યૂટ દૃશ્યોનો કોઇ પણ વિરોધ નોંધાવ્યો નથી. સેન્સર બોર્ડે શુક્રવારે દિગ્દર્શક સેથ ગોર્ડેનની ફિલ્મ બેવોચ જોઇ હતી અને લગભગ પાંચ કટ સાથે એ સર્ટિફિકેટ આપ્યું હતું. જે પાંચ કટ ફિલ્મમાં કરાયા છે તેમાં ચાર વર્બલ અને એક વિઝ્યુઅલ દૃશ્યનો સમાવેશ થાય છે.
આ ફિલ્મમાં ડ્વેઇન જ્હોન્સન, જેક ઇફ્રોન અને પ્રિયંકા ચોપડા લીડ રોલમાં છે. પ્રિયંકા ફિલ્મમાં નકારાત્મક કિરદારમાં જોવા મળવાની છે. ફિલ્મમાં તેના કિરદારનું નામ વિક્ટોરિયા લીડ્સ છે. આ ફિલ્મ ‘૯૦ના દાયકામાં આવેલો ટીવી શો બેવોચ પર આધારિત છે. ફિલ્મમાં દરિયાકિનારે બિકિની અવતારમાં ચાલતી લાઇફગાર્ડ સામે સેન્સર બોર્ડને કોઇપણ સમસ્યા નથી.સેન્સર બોર્ડના ચીફ પહલાજ નિહલાનીએ જણાવ્યું હતું કે આ બિકિની દૃશ્યો કોઇ પણ પ્રકારે દર્શકોને ઉત્તેજક કરવાના નથી અને તેથી જ દરિયાકિનારા પરનાં દૃશ્યો તેમ જ અભિનેત્રીઓએ પહેરેલી બિકિની સામે બોર્ડે વિરોધ નોંધાવ્યો નથી. ફિલ્મમાં કેટલાંક સ્થાને અભદ્ર શબ્દોનો ઉપયોગ કરાયો હતો જેના પર બોર્ડે કાતર ફેરવી છે.
પ્રિયંકા ચોપડાની પહેલી હોલિવૂડ ફિલ્મ બેવોચને ભારતીય સેન્સર બોર્ડે એ સર્ટિફિકેટ આપ્યું
