ભાજપ ૨૦૧૯ની તૈયારીમાં લાગી ગયું છે. અનેક આંદોલનો અને વિપક્ષ દ્વારા સતત સરકાર પર પ્રહારોના કારણે પક્ષને ચૂંટણીમાં નુકસાન ન પહોંચે માટે ભાજપે માસ્ટર પ્લાન ઘડીને તેના પર કામ કરવાનું શરૂ કરી દીધું છે. આ વખતે લોકો વચ્ચે પહોંચવા માટે ફકત કાર્યકર્તાઓ નહીં પણ સાંસદોની પત્નીઓને પણ મેદાનમાં ઉતારાશે. આ માટે સાંસદોની પત્નીઓને ખાસ પ્રકારની તાલીમ અપાઈ છે જેથી તેઓ લોકો વચ્ચે પક્ષના પ્રચાર સાથે સાથે પતિના રાજકીય કાર્યોમાં સહાયક પણ બનશે. આ માટે પક્ષે રીતસર બે દિવસની શિબિર યોજી હતી જેમાં પાર્ટી અધ્યક્ષ અમિત શાહ, વરિષ્ઠ નેતા લાલકૃષ્ણ અડવાણી અને સુષ્મા સ્વરાજે ભાગ લીધો હતો. ભાજપના સૂત્રોનું માનીએ તો હાલ આ અંગે ઔપચારીક રીતે કોઈ નિર્ણય જાહેર કરવામાં નથી આવ્યો પરંતુ આ કાર્યક્રમનું એક લક્ષ્ય એ પણ હતું કે સાંસદોની પત્નીઓને રાજકરણની સમજ આવી તેમનામાં રહેલી રાજકીય સમજને પારખવામાં પણ આવે જેથી જરુર પડ્યે પક્ષના પ્રચાર અને પ્રસાર માટે તેમનો પણ ઉપયોગ કરી શકાય. બે દિવસના આ કાર્યક્રમમાં ફકત સાંસદોની પત્નીઓ જ નહીં મહિલા સાંસદોએ પણ ભાગ લીધો હતો.
પાર્ટીના નેતાઓનું કહેવું છે કે સામાન્ય રીતે આ પ્રકારના કાર્યક્રમમાં પહેલા માત્ર ૪૦-૫૦ મહિલાઓ ભાગ લેતી હતી. જોકે આ વખતે ૨૦૧૯ની તૈયારી ચાલી રહી હોવાથી અનેક સાંસદોની પત્નીઓએ પણ આ કાર્યક્રમમાં જોરશોરથી ભાગ લીધો હતો. પાર્ટીના કેટલાક નેતાઓનું માનવું છે કે આ કાર્યક્રમ પાછળ એવો પણ હેતું હોઈ શકે છે કે સાંસદોની પત્નીમાં રહેલા રાજકીય કૌશલને જાણી તેમનું રાજકીય કાર્યક્ષેત્ર પણ વધારવામાં આવે.
પાછલી પોસ્ટ
આગળની પોસ્ટ