નોટબંધી અને જીએસટીના અમલના કારણે વેચાણમાં ફટકો સહન કરનારી એફએમસીજી કંપનીઓ આગામી તહેવારોમાં વેચાણમાં વધારો કરવા મરણિયો પ્રયાસ કરવાની છે.
બિસ્કિટ્સ, સ્નેક્સ, જ્યુસ, ટૂથપેસ્ટ તથા હેર ઓઇલ સહિતની જીવન જરૂરિયાતની ચીજવસ્તુઓના ઉત્પાદકો કહે છે કે સપ્ટેમ્બર-ડિસેમ્બર મહિનામાં વપરાશ વધારવા માટેના ખર્ચમાં આગલા વર્ષના સમાન ગાળાની સરખામણીએ ૧૫-૨૦ ટકાનો વધારો થવાની સંભાવના છે, ગ્રાહકોમાં ખરીદી માટેનું સેન્ટિમેન્ટ સુધારવાની અપેક્ષા છે.
બિસ્કિટ ઉત્પાદક કંપની પારલે પ્રોડક્ટ્સના માર્કેટિંગ હેડ મયંક શાહે જણાવ્યું હતું કે, પાછલા કેટલાક મહિનાઓ દરમિયાન નોટબંધી તથા જીએસટીના અમલના કારણે ઉત્સાહહીન વાતાવરણ હતું.
કંપનીઓ કન્ઝ્યુમર પ્રમોશનને વેગ આપીને આ અસરને સરભર કરવા આયોજન કરે છે. ગ્રામીણ માંગ પુનઃજીવંત થઈ છે તથા ચોમાસુ સારું છે. આ પરિબળોના કારણે અમે આ વર્ષે તહેવારોની સીઝન સારી રહેવાની આશા રાખી રહ્યા છીએ, તેથી તે પ્રમાણે ખર્ચમાં ક્રમિક વધારો થશે.
પેપ્સિકો, મેરિકો અને ડાબર જેવી કંપનીઓ પણ તહેવારોની સીઝનમાં ખર્ચમાં વધારો થવાની આશા રાખે છે અને ફેસ્ટિવલ પ્રમોશન પરના ખર્ચમાં વધારો કરવાનું આયોજન ધરાવે છે. તહેવારોની સીઝન ઓક્ટોબરથી ડિસેમ્બર ચાલે છે. તેમાં જાહેરાત સેક્ટરની કુલ વાર્ષિક આવકના ૪૦ ટકાનો હિસ્સો ધરાવે છે. આ વર્ષે તેમાં વહેલી શરૂઆત સપ્ટેમ્બરમાં થઈ છે.
હેર ઓઇલ, જ્યુસ, ટૂથપેસ્ટ તથા સ્કીન કેર પ્રોડક્ટનું ઉત્પાદન કરતી ડાબરે જણાવ્યું કે, તે આગામી મહિનાઓમાં નવી પ્રોડક્ટના લોંચિગ તથા રિલોંચિંગ સાથે વધેલા ખર્ચ સાથે પરત ફરશે, જેમાં તેની વાટિકા શેમ્પૂ બ્રાન્ડના રિલોન્ચિંગનો પણ સમાવેશ થાય છે.
કન્ઝ્યુમર સેન્ટિમેન્ટ, ખાસ કરીને ગ્રામીણ ભારતમાં ઉત્સાહ છે કારણ કે સતત બે વર્ષ ચોમાસા સારાં રહ્યાં છે. જીએસટીનો અમલ પણ સેટ થઈ રહ્યો છે. તે સાથે શહેરી માંગમાં પણ સુધારાની શરૂઆત થઈ છે.તહેવારોની સીઝન દરમિયાન સમાચાર માધ્યમોમાં પ્રચાર પાછળનો તથા નવી પ્રોડક્ટ્સને લોંચ કરવા પાછળનો ખર્ચ વધશે.
એડલવાઇઝ સિક્યોરિટીઝ દ્વારા ગયા સપ્તાહે લોન્ચ કરવામાં આવેલા એક અહેવાલમાં તેણે આગાહી કરી હતી કે વાર્ષિક ધોરણે ૧૫ ટકાનો વધારા સાથે વર્ષના બીજા છમાસિક ગાળા દરમિયાન જાહેરાત તથા કન્ઝ્યુમર પ્રમોશન પાછળનો ખર્ચ કમબેક કરશે. અહેવાલ કહે છે કે, નવા લોંચિંગ સાથે ટર્નઅરાઉન્ડની સંભાવના છે.