તમિળનાડુના પૂર્વ મુખ્યમંત્રી જયલલિતાના અવસાન બાદ બે ભાગમાં વિભાજિત થયેલી પાર્ટી ફરીએકવાર એક થઇ શકે છે. શશીકલાના ભત્રીજા દિનાકરણની સામે મુખ્યમંત્રી પલનીસામી અને પૂર્વ મુખ્યમંત્રી પનીરસેલ્વમ આ સપ્તાહમાં ફરી હાથ મિલાવી શકે છે. મુખ્યમંત્રી પલનીસામીના નેતૃત્વમાં એક દૂતે આજે ચેન્નાઈની ઓફિસમાં બેઠક યોજી હતી જેમાં શશીકલા અને તેમના ભત્રીજા દિનાકરણની પાર્ટીથી વિદાય માટેની સ્ક્રીપ્ટ લખવામાં આવી હતી. તમિળનાડુના પ્રધાન ડી જયકુમારે બંનેને સાથે લાવવાની વાત કરી છે. સાથે સાથે વિશ્વાસ વ્યક્ત કરતા કહ્યું છે કે, આના કારણે પાર્ટીને મજબૂતી આપવામાં ફાયદો મળશે. તમિળનાડુના મુખ્યમંત્રી પલનીસામીના નેતૃત્વમાં યોજવામાં આવેલી બેઠકમાં એક પ્રસ્તાવ પસાર કરવામાં આવ્યો હતો જેમાં કહેવામાં આવ્યું હતું કે, શશીકલાના સહાયક તરીકે દિનાકરણની નિમણૂંક પાર્ટીના પેટા નિયમની સામે છે. પાર્ટી ઓફિસ પર થયેલી બેઠકમાં કહેવામાં આવ્યું હતું કે, જયલલિતાએ ડિસેમ્બર ૨૦૧૧માં દિનાકરણને પાર્ટીના સભ્યપદેથી દૂર કરાયા હતા.
અન્નાદ્રમુકના બે જુથ એક થાય તેવા પ્રબળ એંધાણ
