અનંત અંબાણીના પ્રી-વેડિંગ ફંક્શનમાં પર્ફોર્મ કરશે આલિયા-રણબીર

હાલમાં જ એક ફેનપેજ પર વિડીયો શેર કરવામાં આવ્યો છે. જેમાં આકાશ અંબાણી તેના ખાસ દોસ્ત રણબીર કપૂર અને તેની પત્ની આલિયા ભટ્ટ સાથે જોવા મળે છે. આ વિડીયો અંબાણી પરિવારના જામનગર સ્થિત ફાર્મહાઉસનો હોવાનું કહેવાઈ રહ્યું છે. ફેનપેજના દાવા પ્રમાણે, આલિયા-રણબીર અનંત-રાધિકાના પ્રી-વેડિંગ ફંક્શનમાં ડાન્સ કરશે. આકાશ સફેદ ટી-શર્ટ અને શોર્ટ્સમાં જોવા મળે છે. જ્યારે આલિયાએ ગ્રે-રંગની ટી-શર્ટ અને ટ્રેક પહેર્યા હતા. જ્યારે રણબીર બ્લેક રંગના જેકેટ અને ગ્રે રંગના શર્ટમાં હેન્ડસમ લાગી રહ્યો હતો.

ઉલ્લેખનીય છે કે, બે દિવસ પહેલા જ રણબીર કપૂર અને આલિયા ભટ્ટ દીકરી રાહા સાથે મુંબઈના પ્રાઈવેટ એરપોર્ટ પર જોવા મળ્યા હતા. તેઓ ક્યાં જઈ રહ્યા હતા તેની વિગતો નહોતી મળી. એવામાં હાલ સોશિયલ મીડિયા પર જે વિડીયો વાયરલ થઈ રહ્યો છે તેના પરથી અંદાજો લગાવવામાં આવી રહ્યો છે કે, આલિયા-રણબીર અનંત-રાધિકાના પ્રી-વેડિંગ ફંક્શનના પર્ફોર્મન્સ માટે પ્રેક્ટિસ કરવા જામનગર ગયા હશે. સોમવારે સવારે આલિયા-રણબીર અને રાહા મુંબઈ પરત આવી ગયા છે.

વર્કફ્રંટની વાત કરીએ તો, રણબીર કપૂર નીતેશ તિવારીને ‘રામાયણ’માં ભગવાન રામના રોલમાં જોવા મળશે. સાઉથની એક્ટ્રેસ સાંઈ પલ્લવી સીતાના રોલમાં છે તેવી ચર્ચા છે. જ્યારે કેજીએફનો એક્ટર યશ રાવણના રોલમાં જોવા મળશે. આ ફિલ્મનું શૂટિંગ લંડન અને ભારતમાં થવાનું છે. આ સિવાય રણબીર પાસે સંજય લીલા ભણસાલીની ફિલ્મ ‘લવ એન્ડ વોર’ છે જેમાં તે આલિયા અને વિકી કૌશલ સાથે દેખાશે. ઉપરાંત ‘એનિમલ પાર્ક’ અને ‘બ્રહ્માસ્ત્ર 2’માં પણ રણબીર કપૂર દેખાશે. આલિયાની વાત કરીએ તો તે ‘જિગરા’માં જોવા મળશે.