અમદાવાદથી અયોધ્યાના વિમાન ભાડા આસમાને પહોંચ્યા

દાયકાઓની લડાઈ અને સંઘર્ષ બાદ અંતે રામ મંદિરનું લાખો ભક્તોનું સપનું સાકાર થવા જઈ રહ્યું છે ત્યારે લોકોનો ઉત્સાહ પણ ચરમસીમા પર છે. હાલમાં સમગ્ર દેશમાં તેની ચર્ચા થઈ રહી છે. મંદિરમાં પ્રાણ પ્રતિષ્ઠાનો પ્રસંગ ફક્ત ગુજરાત જ નહીં પરંતુ સમગ્ર ભારતમાંથી ભક્તોને આકર્ષી રહ્યો છે. 22મી જાન્યુઆરીએ નિર્માણાધીન શ્રી રામ મંદિરમાં પ્રાણ પ્રતિષ્ઠા મહોત્સવમાં વિશ્વભરના ભક્તો સાથે ઘણા ગુજરાતીઓ જોડાવા માટે તૈયાર છે. વડાપ્રધાન નરેન્દ્ર મોદી સહિત હાઈ-પ્રોફાઇલ વ્યક્તિઓ ત્યાં હાજર રહેવાની છે. જેમાં રાજકીય હસ્તીઓથી લઈને બિઝનેસ અને ફિલ્મ તથા રમતજગતની હસ્તીઓને આમંત્રણ આપવામાં આવ્યું છે. ગુજરાતીઓ પણ આ ઐતિહાસિક પ્રસંગનો ભાગ બનવા માટે આતુર છે જેના કારણે 16મી અને 22મી જાન્યુઆરી વચ્ચેના હવાઈ ભાડામાં ઉછાળો નોંધાયો છે.