વિધાનસભાની ચૂંટણીઓમાં ભાજપે ચારમાંથી ત્રણ રાજ્યમાં બહુમતી મેળવી હોવાથી શેરબજાર પર તેની પોઝિટિવ અસર પડી છે. આજે સેન્સેક્સ સીધું 950 પોઈન્ટથી વધારે અપમા ખુલ્યું હતું. આ લખાય છે ત્યારે સેન્સેક્સ 985 પોઈન્ટ વધીને 68466 પર ચાલે છે જ્યારે નિફ્ટી 305 પોઈન્ટ અથવા 1.50 ટકા વધીને 20572 ની સપાટી પર છે. વિધાનસભાની ચૂંટણીમાં ભાજપે એક્ઝિટ પોલ કરતા પણ વધુ સારો દેખાવ કર્યો છે અને રાજસ્થાન, મધ્ય પ્રદેશ અને છત્તીસગઢ જેવા નોર્થના રાજ્યો જીતી લીધા છે, જ્યારે તેલંગણામાં કોંગ્રેસનો વિજય થયો છે.
મિઝોરમમાં આજે મતગણતરી ચાલુ છે. આગામી લોકસભાની ચૂંટણી માટે ભાજપનો જુસ્સો ઘણો વધી ગયો છે અને વડાપ્રધાન નરેન્દ્ર મોદીએ 2024માં પણ હેટટ્રિક કરવાનું એલાન કર્યું છે. તેના કારણે સ્ટોક માર્કેટમાં આજે તીવ્ર વધારો જોવા મળ્યો છે.
આ લખાય છે ત્યારે ICICI Bank, SBI, ભારતી એરટેલ, Mahindraના શેરમાં બે ટકા કરતા વધુ વધારો થયો છે. માત્ર મારુતિ સુઝુકીનો શેર ઘટાડે ચાલી રહ્યો છે. બાકી સેન્સેક્સના 30માંથી 29 શેર પોઝિટિવ છે.
ભારતીય બજાર પર એશિયન બજારોના ટ્રેડની પણ અસર પડી છે જેમાં ફેડ રિઝર્વે જણાવ્યું છે કે તેમને વ્યાજના દરમાં ઘટાડો કરવાની કોઈ ઉતાવળ નથી. આજે ગોલ્ડ અને ઓઈલના ભાવમાં પણ વધારો થયો છે. શુક્રવારે અમેરિકન સ્ટોક્સ અને બોન્ડમાં ઉછાળો આવ્યો હતો.
એક્સપર્ટ શું કહે છે?
જિયોજિત ફાઈનાન્શિયલ સર્વિસિસના ચીફ ઈન્વેસ્ટમેન્ટ સ્ટ્રેટેજિસ્ટ ડો. વી કે વિજયકુમારે જણાવ્યું કે રાજ્યોની ચૂંટણીના પરિણામો માર્કેટ માટે મોટી ઈવન્ટ સાબિત થયા છે. માર્કેટને રાજકીય સ્થિરતા અને સુધારાતરફી, માર્કેટ ફ્રેન્ડલી સરકાર પસંદ હોય છે. બજારના દૃષ્ટિકોણથી જોવામાં આવે તો આ રિઝલ્ટ અપેક્ષા કરતા પણ વધુ સારું હતું. ભાજપના વિજયને પહેલેથી ડિસ્કાઉન્ટ કરી દેવાયું હતું. પરંતુ આ વખતનો મૂડ અલગ હતો. નજીકના ગાળામાં બજાર ફંડામેન્ટલ્સને અવગણીને ઉપર વધતું રહેશે.