ભારતના એગ્રેસિવ બેટ્સમેન તરીકે જાણીતા વિરાટ કોહલીએ આ વખતના વર્લ્ડકપમાં પણ ધૂમ મચાવી છે. વિરાટ અને ભારતીય ટીમ બંને અત્યારે ફોર્મમાં છે અને એક પછી એક મેચમાં વિજય થઈ રહ્યો છે. વિરાટ કોહલીના ફોર્મ અને ભારતના પરફોર્મન્સ વચ્ચે સીધો સંબંધ છે. અત્યાર સુધીનો રેકોર્ડ દર્શાવે છે કે વિરાટ સદી ફટકારે ત્યારે 85 ટકા કેસમાં ભારતનો વિજય થતો હોય છે. કોહલીએ વનડેમાં 48 સદી ફટકારી છે જેમાંથી 40 વખત ભારત જીતી ગયું હતું. ગયા સપ્તાહમાં કોહલીએ બાંગ્લાદેશ સામે સદી ફટકારી જે તેની 48મી વનડે સેન્ચુરી હતી. હવે તે સચિન તેંડુલકરની 49 વનડે સદીના રેકોર્ડથી માત્ર એક સદી દૂર છે. ન્યૂ ઝિલેન્ડ સામેની મેચમાં કોહલી સદીથી બિલકુલ નજીક આવી ગયો હતો, પરંતુ કમનસીબે 95 રનના સ્કોર પર આઉટ થઈ ગયો હતો. કોહલી અને સચિન વચ્ચે તુલના કરવામાં આવે તો કોહલીની 49 સદીમાંથી 40 વખત ભારત વિજેતા બન્યું હતું જ્યારે સચિનની 49 સદીમાંથી 33 વખત ભારતનો વિજય થયો હતો. એટલે કે કોહલી 100 રન કરે ત્યારે ભારત જીતી જાય તેવી શક્યતા ઘણી વધુ રહે છે.
આંતરરાષ્ટ્રીય ક્રિકેટમાં ઓવરઓલ દેખાવ જોવામાં આવે તો કોહલીએ કુલ 78 સદી ફટકારી છે જેમાંથી 54 સદી વખતે ભારતની જીત થઈ હતી. કોહલી કરતા વધુ સારો દેખાવ માત્ર રિકી પોન્ટિંગનો છે જેની કુલ 55 સદી વખતે ભારતની જીત થઈ હતી. તમામ ઈન્ટરનેશનલ સદી ગણવામાં આવે તો સચિનની 53 સદી એવી છે જેમાં ભારતનો વિજય થયો હતો.
ભારત હવે લખનૌમાં ઈંગ્લેન્ડ સાથે ટકરાવાનું છે. ઈંગ્લેન્ડ ગયા વખતે વર્લ્ડકપ વિજેતા બન્યું હતું, પરંતુ આ વખતે નબળી ટીમો સામે પણ હારી રહ્યું છે. સાઉથ આફ્રિકા અને બાંગ્લાદેશની મેચ થઈ ત્યાં સુધી કોહલીએ પાંચ મેચમાં 354 રન બનાવ્યા તે આ વખતના વર્લ્ડકપમાં કોઈ પણ બેટ્સમેનના સૌથી વધુ રન હતા. પરંતુ સાઉથ આફ્રિકાના બેટ્સમેન ક્વિન્ટોન ડીએ 174 રન ફટકારતા તે હવે આગળ નીકળી ગયો છે. ક્વિન્ટોન ડીના આ વખતના વર્લ્ડકપમાં કુલ 407 રન થઈ ગયા છે. ભારતીય ટીમનો કેપ્ટન રોહિત શર્મા કુલ 311 રન સાથે આ વર્લ્ડકપમાં ત્રીજા નંબર પર છે.
