મુંબઈના ભાંડુપ ખાતે એન્જિનિયરિંગ કંપની ગેસ્ટ કીન વિલિયમ્સની 37 એકર જમીનનો સોદો થઈ ગયો છે, જ્યાં રિયલ એસ્ટેટ ડેવલપ કરવામાં આવશે. આ પ્રોજેક્ટ તૈયાર થશે ત્યારે તેની સેલ વેલ્યૂ 11,000 કરોડ સુધી પહોંચવાની શક્યતા છે. ગેસ્ટ કીન વિલિયમ્સ કંપની હાલમાં બંધ પડેલી છે અને તેની લેન્ડ ડીલમાં હવે મહિન્દ્રા લાઈફસ્પેસ પણ જોડાઈ છે. જમીનની માલિક કે કે બાંગુર અને મહિન્દ્રા લાઈફસ્પેસ મળીને આ પ્લોટને ડેવલપ કરશે. આ એક મિક્સ યુઝ પ્રોજેક્ટ હશે જેમાં રેસિડેન્શિયલ, રિટેલ અને ઓફિસ સ્પેસનો સમાવેશ થશે. આ પ્રોજેક્ટની સેલ વેલ્યૂ 8000 કરોડથી 11,000 કરોડ ઉપજવાની શક્યતા છે. ડેવલપર્સ અહીં લગભગ 40 લાખ ચોરસ ફીટ કારપેટ એરિયાને વિકસાવશે. સમગ્ર પ્રોજેક્ટ પૂરો થવામાં 8થી 10 વર્ષનો સમય લાગી શકે છે. તેમાં શાળા, પ્લેગ્રાઉન્ડ અને થિયેટર જેવી પબ્લિક સુવિધાઓ પણ સામેલ હશે. અગાઉ વર્ષ 2005માં આ જમીન નેપ્ચ્યુન ગ્રૂપને વેચવામાં આવી હતી.
આ વિશે મહિન્દ્રા લાઈફસ્પેસના ચેરમેન અમિત હરિયાણીનો સંપર્ક થઈ શક્યો નથી, પરંતુ સૂત્રોનું કહેવું છે કે આ જોઈન્ટ ડેવલપમેન્ટ માટે તાજેતરમાં ટર્મશીપ પર સહી કરવામાં આવી હતી અને ડેવલપરે માલિકને જંગી ડિપોઝિટ ચુકવી છે. ડેવલપર લગભગ 40 લાખ ચોરસ ફીટ કાર્પેટ એરિયા વેચી શકશે. હાલમાં ભાંડુપમાં એક ચોરસ ફૂટનો ભાવ લગભગ 22,000થી 24,000 રૂપિયા ચાલે છે. વર્ષ 2005માં જીકેડબલ્યુએ 92 કરોડ રૂપિયામાં ભાંડુપના પ્લોટમાંથી લગભગ 22 એકર જગ્યા નેપ્ચ્યુન ગ્રૂપને વેચી હતી.
મુંબઈમાં આ વધુ એક મોટી રિયલ્ટી ડીલ છે. સપ્ટેમ્બર મહિનામાં 5000 કરોડનો એક મોટો સોદો પણ થયો હતો જેમાં બોમ્બે ડાઈંગના વાડિયા વરલી હેડક્વાર્ટરને વેચવામાં આવ્યું છે. આ જગ્યા પ્રીમિયમ ગણવામાં આવે છે અને આ સોદામાં એક લાખ ચોરસ મીટર કરતા પણ મોટી જમીન વેચાઈ છે. આ ડીલમાં 18 એકર જમીન જાપાની જૂથ સુમિટોમોને વેચવામાં આવી છે. થોડા વર્ષો અગાઉ બ્રૂકફિલ્ડ એસેટ મેનેજમેન્ટ કંપનીએ પોવેઈમાં 6700 કરોડમાં હીરાનંદાણી ગ્રૂપની ઓફિસ અને રિટેલ સ્પેસ ખરીદી હતી.
