આવકવેરા રિટર્ન ભરવાની સિઝન ચાલુ છે અને 31 જુલાઈએ આઈટી રિટર્ન ભરવાની છેલ્લી તારીખ છે. આ દરમિયાન છેલ્લા ચાર-પાંચ વર્ષમાં ઘણા લોકોએ આઈટી રિટર્નમાં ઓછી આવક દેખાડી હોય તેવું આવકવેરા વિભાગને લાગે છે. તેના કારણે આઈટી વિભાગ ઘણા લોકોને ધડાધડ નોટિસ ફટકારી રહ્યું છે. નાણા મંત્રી નિર્મલા સીતારમણે જણાવ્યું છે કે આવકવેરા વિભાગે એક લાખ લોકોને નોટિસ ફટકારી છે. આ લોકોએ તેમની આવક ઓછી દેખાડી છે અથવા ઘણા કેસમાં આવક ડિકલેર નથી કરી. તેમણે આ વિશે વધારે સ્પષ્ટતા નથી કરી, પરંતુ એટલું જણાવ્યું હતું કે આ તમામ કેસ 4થી 6 વર્ષ જૂના આઈટી રિટર્નને લગતા છે. 31 માર્ચ 2024 સુધીમાં આ તમામ નોટિસ પર સ્ક્રુટિનીનું કામ પૂર્ણ થઈ જશે.
સૂત્રોએ જણાવ્યા પ્રમાણે જે લોકોની વાર્ષિક આવક 50 લાખ રૂપિયા કરતા વધારે છે તેમને નોટિસ આપવામાં આવી છે. કારણ કે તેમની આવકમાં હજુ ઘણી જગ્યાએ મિસમેચ જોવા મળે છે. આ ઉપરાંત જે લોકોએ આઈટી રિટર્ન ફાઈલ નથી કર્યા તેમને પણ નોટિસ પાઠવવામાં આવી છે. આવકવેરાના કાયદા પ્રમાણે આઈટી વિભાગના અધિકારી છેલ્લા છ વર્ષના આઈટી રિટર્નની ચકાસણી કરીને તેના એસેસમેન્ટ પછી નોટિસ આપી શકે છે.
આવકવેરે વિભાગ અલગ અલગ કારણોથી કરદાતાઓને નોટિસ ફટકારી શકે છે. તેમાં ટોચના 4 કારણો આ મુજબ છેઃ
1) ટીડીએસની રકમમાં મિસમેચ હોય ત્યારે આઈટીની નોટિસ આવી શકે છે. ફોર્મ 26AS અને 16 અથવા 16A હેઠળ ટીડીએસના આંકડા અલગ હોય ત્યારે નોટિસ આવવાનું જોખમ રહે છે.
2) ફોર્મ 26-એ અને તમારી આવકના રિટર્ન વચ્ચે તફાવત હોય ત્યારે પણ નોટિસ આવી શકે છે.
3) કેટલીક વખત ખોટા સેક્શનમાં માહિતી ભરીને ડિડક્શન ક્લેમ કરવામાં આવે અથવા વ્યાજની આવક દર્શાવી ન હોય, ડિવિડન્ડની આવક દર્શાવવાની રહી ગઈ હોય ત્યારે નોટિસ મળી શકે છે.
4) કોઈ નાણાકીય વર્ષમાં તમે હાઈ વેલ્યૂ ટ્રાન્ઝેક્શનની માહિતી ન આપો. જેમ કે 10 લાખથી વધારે રકમના ફોરેન કરન્સીમાં ઈન્ટરનેશનલ ટ્રાન્ઝેક્શનની માહિતી આપી ન હોય તો નોટિસ મળી શકે છે.
