શું તમને પણ એવું લાગે છે કે બારેમાસ ખૂબ ગરમી પડે છે? આપણે થોડાક જ દિવસ ઠંડકનો અનુભવ કરીએ છીએ? તો તમારો અંદાજો સાવ ખોટો નથી. સેપ્ટ યુનિવર્સિટી અને વર્લ્ડ બેંકના તાજેતરમાં આવેલા રિપોર્ટમાં ઉલ્લેખ છે કે, અમદાવાદમાં યુનિવર્સલ થર્મલ ક્લાઈમેટ ઈન્ડેક્સ (UTCI) 46 પોઈન્ટ કરતાં વધુ છે. 365માંથી 331 દિવસ અમદાવાદમાં ગરમી પડે છે. સાઉથ એશિયાના તમામ શહેરોમાંથી અમદાવાદ UTCI મામલે મોખરે છે, તેમ સર્વેમાં કહેવામાં આવ્યું છે.
રિપોર્ટમાં 26 શહેરોનો ઉલ્લેખ કરવામાં આવ્યો છે. જેમાં બીજા સ્થાને મુંબઈ અને કરાંચી આવે છે. અહીં 242 દિવસ UTCI 46 પોઈન્ટ કરતાં ઉપર હોય છે. 229 દિવસ સાથે દિલ્હી ત્રીજા ક્રમે છે. UTCI થર્મલ કમ્ફર્ટ ઈન્ડિકેટર છે, જે હ્યુમન હીટ બેલેન્સ મોડલ પર આધારિત છે. જે બહારના થર્મલ વાતાવરણની આપણા પર શારીરિક અસર કેવી થાય છે તે દર્શાવે છે. ‘ઈમ્પ્રુવિંગ બિલ્ડિંગ લેવલ- થર્મલ કમ્ફર્ટ એન્ડ ઈનડોર એર ક્વોલિટી ઈન સાઉથ એશિયા: એનર્જી એફિશિયન્ટ એન્ડ કોસ્ટ ઈફેક્ટિવ ઈન્ટરવેન્શન ફોર એ ચેન્જિંગ ક્લાઈમેટ’ નામના રિપોર્ટમાં આ સર્વેના સંશોધનો રજૂ કરવામાં આવ્યા છે.