ઉત્તરાખંડની કેદારનાથ ધામ મંદિર સમિતિએ સ્થાનિક પોલીસ પ્રશાસનને કેદારનાથ ધામ મંદિરમાં આવીને યુટ્યુબ વીડિયો અને રીલ્સ બનાવનારાઓ સામે કાર્યવાહી કરવાની માગ કરી છે. તાજેતરમાં આવા ઘણાં વીડિયો વાયરલ થયા છે કે જેમાં યુટ્યુબર્સ મંદિરની સામે આ પ્રકારે વીડિયો શૂટ કરી રહ્યા છે. હાલમાં જ એક મહિલા યુટ્યુબરનો એક વીડિયો વાયરલ થઈ રહ્યો છે કે જેમાં તે તેના બોયફ્રેન્ડને મંદિરની સામે પ્રપોઝ કરી રહી છે.
બદ્રીનાથ-કેદારનાથ ટેમ્પલ કમિટી (BKTC) ચારધામ મહાપંચાયતના ઉપાધ્યક્ષ અને વરિષ્ઠ તીર્થ પુરોહિતે કેદારનાથ ધામમાં પોતાના પ્રેમીને પ્રપોઝ કરતા બ્લોગરનો વાયરલ વિડિયોને આધાર બનાવ્યો છે. બદ્રી-કેદાર મંદિર સમિતિએ કેદારનાથ પોલીસ ચોકીને પત્ર લખીને આવી રીલ્સ બનાવનારાઓ પર નજર રાખવા જણાવ્યું છે કે જેથી ધાર્મિક પરંપરાઓ સાથે કશું ખોટું ના થાય.
હાલમાં જ કેદારનાથ ધામના ગર્ભગૃહનો એક વીડિયો પણ વાયરલ થયો હતો કે જેમાં એક મહિલા શિવલિંગ પર નોટો ઉડાવી રહી હતી. તે સમયે પૂજારીઓ પણ હાજર હતા. લોકોએ એવો સવાલ ઉઠાવ્યો હતો કે સામાન્ય લોકો સામે વાંધો ઉઠાવનારા પૂજારીઓ આ સમયે પૂજા શા માટે ચાલુ રાખતા હતા. તમે તે સ્ત્રીને આમ કરતા કેમ ના રોકી? તેમજ ગર્ભગૃહમાં વિડીયોગ્રાફીની મનાઈ છે ત્યારે ત્યાં કેવી રીતે વિડીયો બનાવાયો અને કેમ વાયરલ થયો.
