મધ્યપ્રદેશના મોરેના જિલ્લામાંથી ઓનર કિલિંગનો એક શંકાસ્પદ કેસ સામે આવ્યો છે, જ્યાં એક યુવતી અને તેના પ્રેમીની માતા-પિતાએ કથિત રીતે હત્યા કર્યા બાદ લાશને પથ્થર સાથે બાંધી દીધી હતી, જે બાદ મગરથી ભરેલી ચંબલ નદીમાં ફેંકી દીધી હતી. મોરેનાના એસપી શૈલેન્દ્ર સિંહ ચૌહાણે કહ્યું હતું કે, આરોપી દ્વારા ઓળખવામાં આવેલા કેટલાક સ્થળ પર ગોતાખોરોની મદદથી તેમના મૃતદેહની શોધ કરવામાં આવી રહી છે. ‘અમને હજી સુધી કંઈ જ મળ્યું નથી. તપાસ ચાલી રહી છે’, તેમ એક અધિકારીએ કહ્યું હતું. મોરેના જિલ્લાના અંબાહ પોલીસ સ્ટેશનમાં કેસ દાખલ કરવામાં આવ્યો હતો.
રિપોર્ટ્સ પ્રમાણે, ઘટના આશરે બે મહિના પહેલા બની હતી. યુવતીના પરિવારે અન્ય કેટલાક સંબંધો સાથે મળીને યુવાન કપલને ગોળી ધરબી દીધી હતી. જે બાદ તેમની લાશને નદીમાં ફેંકી દીધી હતી. આ ગુનાની જાણ થયા બાદ પોલીસે સ્ટેટ ડિઝાસ્ટર રિસ્પોન્સ ફોર્સની (SDRF) ટીમ અને ગોતાખોરોને તૈનાત કર્યા હતા. ઘટના રતનબસાઈ ગામમાં બની હતી. આ ગામમાં રહેતી 18 વર્ષની શિવાની તોમરને પાડોશી ગામ બાલુપુરામાં રહેતા 21 વર્ષીય રાધેશ્યામ તોમર સાથે અફેર હતું. જો કે, જ્ઞાતિ સહિતના કેટલાક મુદ્દાને ધ્યાનમાં રાખીને બંનેનો પરિવાર તેમના આ સંબંધોની સખત વિરોધમાં હતો.
