દેશના સૌથી મોટા ઉદ્યોગપતિ મુકેશ અંબાણી (Mukesh Ambani)ની કંપની રિલાયન્સ ઈન્ડસ્ટ્રીઝ (Reliance Industries)એ વધુ એક સિદ્ધિ મેળવી છે. ફોર્બ્સ ગ્લોબલ 2000 લિસ્ટમાં રિલાયન્સ 8 પદની છલાંગ લગાવીને 45મા ક્રમ પર પહોંચી ગઈ છે. ભારતની તમામ કંપનીઓમાં રિલાયન્સ ઈન્ડ. સૌથી આગળ છે. ગયા વર્ષે આ યાદી બહાર પડી ત્યારે રિલાયન્સ તેમાં 53મા ક્રમ પર હતી. ફોર્બ્સની આ યાદીમાં વિશ્વની સૌથી મોટી કંપનીઓના નામ તારવવામાં આવે છે. તેમાં કંપનીના સેલ્સ, નફો, એસેટ અને માર્કેટ વેલ્યૂના આધારે રેન્કિંગ આપવામાં આવે છે. આ રેન્કિંગમાં રિલાયન્સ ઈન્ડસ્ટ્રીઝ 8 સ્થાન આગળ આવી છે.
અમેરિકાની સૌથી મોટી બેન્ક જેપી મોર્ગન આ લિસ્ટમાં પ્રથમ ક્રમે છે. જેપી મોર્ગનની એસેટ લગભગ 3.7 ટ્રિલિયન ડોલરની છે અને 2011 પછી આ બેન્ક પહેલી વખત ફોર્બ્સ ગ્લોબલ 2000 લિસ્ટમાં નંબર વન બની છે. તાજેતરમાં અમેરિકાના બેન્કિંગ સેક્ટરમાં કટોકટી આવી હતી જેમાંથી જેપી મોર્ગન મજબૂત બનીને ઉભરી આવી છે. કંપનીની ડિપોઝિટમાં વધારો થયો છે અને તેણે ફર્સ્ટ રિપબ્લિક બેન્કને એક્વાયર કરી છે.
ગયા વર્ષે ફોર્બ્સની યાદીમાં નંબર વન રહેલી વોરેન બફેટની બર્કશાયર હેથવે આ વખતે સીધી 338મા ક્રમે પહોંચી ગઈ હતી. કંપનીએ તેના ઈન્વેસ્ટમેન્ટ પોર્ટફોલિયોમાં બિનવાસ્તવિક લોસ નોંધાવી હોવાથી તેની વેલ્યૂમાં જોરદાર ઘટાડો થયો છે. સાઉદી ઓઈલ કંપની અરામકો (Aramco) આ વખતે બીજા ક્રમે છે. જ્યારે ત્યાર પછી ચીનની ત્રણ સરકારી બેન્કોને સ્થાન મળ્યું છે. ટેક્નોલોજી કંપની આલ્ફાબેટ સાતમા ક્રમે છે જ્યારે એપલ (Apple) આ લિસ્ટમાં 10મા ક્રમે છે.
