અદાણી જૂથની કંપનીઓ માટે એક પછી એક નેગેટિવ ખબરો આવી રહી છે ત્યારે રેટિંગ એજન્સી ફિચ (Fitch)એ વધુ એક ચિંતાજનક આગાહી કરી છે. ફિચના રિપોર્ટ પ્રમાણે અદાણી જૂથની કંપનીઓ અદાણી પોર્ટ્સ (Adani Ports) અને અદાણી ટ્રાન્સમિશન (Adani Transmission) પર વધારે ઉંચું નાણાકીય જોખમ છે. અદાણી જૂથમાં સ્પોન્સરના લેવલે ગવર્નન્સની નબળાઈના કારણે આ બંને કંપનીઓ પર જોખમ છે. આ સાથે ફિચે અદાણી જૂથની કંપનીઓને BBB- રેટિંગ આપ્યું છે.
અદાણી પોર્ટ અને અદાણી ટ્રાન્સમિશન પર એવું જોખમ છે જેના કારણે તેની ફાઈનાન્શિયલ ક્ષમતાને અસર થઈ શકે છે. મંગળવારે અદાણી પોર્ટ્સનો શેર 5.7 ટકા તૂટ્યો હતો જ્યારે અદાણી ટ્રાન્સમિશનના શેરમાં 5 ટકાની લોઅર સર્કિટ લાગી હતી. આજે આ લખાય છે ત્યારે અદાણી એન્ટરપ્રાઈઝિસનો શેર 2.30 ટકા વધીને 1639 પર ચાલતો હતો જ્યારે અદાણી પોર્ટ્સ (Adani Ports)નો શેર 2.63 ટકા વધીને 609 પર ચાલતો હતો. અદાણી ટ્રાન્સમિશનના શેરમાં આજે પણ 5 ટકાની લોઅર સર્કિટ લાગતા આ શેર 964 પર ચાલે છે.
અદાણી જૂથ છેલ્લા બે મહિનાથી વિવાદોમાં ઘેરાયેલું છે. અમેરિકન શોર્ટ સેલર હિન્ડનબર્ગના રિપોર્ટ પછી અદાણી ગ્રૂપની વેલ્યૂ અડધા કરતા પણ વધારે ઘટી ગઈ છે. અદાણીની ચાર કંપનીઓમાં તાજેતરમાં GQG પાર્ટનર્સ દ્વારા હિસ્સો ખરીદવામાં આવ્યો હતો જેમાં અદાણી પોર્ટ્સ પણ સામેલ છે. ગઈકાલે અદાણી પોર્ટ્સનો શેર 593 પર પહોંચી ગયો હતો. એટલે કે GQG પાર્ટનર્સે જે ભાવે શેર ખરીદ્યા તેના કરતા પણ ભાવ નીચે જતો રહ્યો છે. એક તબક્કે આ શેરમાં 9 ટકા સુધી ઘટાડો થયો હતો. ફેબ્રુઆરીથી અત્યાર સુધીમાં અદાણી જૂથની કુલ માર્કેટ વેલ્યૂમાં 6.2 અબજ ડોલર કરતા વધુ ઘટાડો થયો છે.
તાજેતરમાં અદાણી જૂથના શેરોએ તેના તળિયેથી સારી એવી રિકવરી કરી હતી. પરંતુ ત્યાર પછી Ken ન્યૂઝના એક રિપોર્ટમાં જણાવાયું હતું કે અદાણીએ તેની તમામ લોનનું રિપેમેન્ટ કર્યું નથી અને ઘણા શેરો હજુ પણ બેન્કો પાસે ગીરવે પડ્યા છે. આ અંગે અદાણી જૂથે સ્પષ્ટતા કરી હતી કે તેની સામેના આરોપો ખોટા અને નિરાધાર છે.
