ભારતમાં સોલર ઊર્જાના ઉપયોગ દિવસેને દિવસે વધી રહ્યો છે.દેશમાં મોટા-મોટા સોલર પ્લાન્ટ પણ સ્થાપિત થઈ રહ્યા છે. દેશમાં તો હવે ઘણા ઘરો પર સોલર પેનલ લગાવેલી જોવા મળી રહી છે. સોલર હીટરનો તો પહેલેથી જ ઉપયોગ થતો રહ્યો છે. સોલર ઊર્જાના ઉપયોગની સાથે-સાથે ભારત હવે સોલર પેનલ્સના એક્સપોર્ટમાં પણ ઘણું આગળ વધી ગયું છે. ભારતમાંથી સોલર પેનલ્સનો ઘણો મોટો ભાગ યુએસ, યુગાન્ડા અને કેન્યા જેવા દેશોમાં એક્સપોર્ટ થઈ રહ્યો છે. સોલર પેનલ એક્સપોર્ટ કરવાના બિઝનેસમાં ચીન, વિયેતનામ અને સિંગાપોર ટોપ પ્લેયર છે. ભારત એક સમયે દુનિયામાં મોટો સોલર ઊર્જાની વસ્તુઓ ઈમ્પોર્ટ કરતો દેશ હતો, જે હવે સોલરની વસ્તુઓ એક્સપોર્ટ કરવા લાગ્યો છે. આવનારા દિવસો રિન્યુએબલ એનર્જીના હશે તે બધા જાણે છે, ત્યારે ભારતે પણ હવે આ સેક્ટરમાં સિક્કો જમાવવા કમર કસી લીધી છે. ત્યારે હવે ભારતમાં સોલર ગ્લાસ મેન્યુફેક્ચરિંગ સાથે જોડાયેલા એક મોટા સમાચાર સામે આવ્યા છે. સોલર ગ્લાસ, સોલર પેનલમાં સોલર સેલને પ્રોટેક્ટ કરવાનું કામ કરે છે.
તમને જાણીને આશ્ચર્ય થશે કે, ભારતમાં હાલમાં માત્ર એક જ કંપની છે જે સોલર ગ્લાસને મેન્યુફેક્ચર કરવાનું કામ કરે છે. આ કંપની છે બોરોસિલ રિન્યુએબલ્સ લિમિટેડ. જોકે, તે પણ જર્મનીની કંપની સાથે મળીને આ કામ કરે છે. તે યુરોપની પણ સૌથી મોટી સોલર ગ્લાસ મેન્યુફેક્ચરર કંપની છે. જોકે, હવે આ ક્ષેત્રમાં એક નાની રિન્યુએબલ એનર્જી કંપનીએ ઝંપલાવ્યું છે. આ કંપનીનું નામ છે ત્રિવેણી રિન્યુએબલ્સ પ્રાઈવેટ લિમિટેડ. આંધ્ર પ્રદેશમાં હેડક્વાર્ટર ધરાવતી આ કંપની હવે આંધ્ર પ્રદેશમાં સોલર ગ્લાસ મેન્યુફેક્ચર સેટઅપ ઊભું કરી રહી છે. લગભગ 1,000 કરોડ રૂપિયાના ખર્ચે ઊભા કરવામાં આવનારા આ યુનિટમાં દરરોજ 840 મેટ્રિક ટન સોલર ગ્લાસ મેન્યુફેક્ચર કરાશે. આંધ્ર પ્રદેશ સરકારને જણાવ્યું હતું કે, આ ગ્લાસમેકર કંપની પૂર્વ ગોદાવરી જિલ્લામાં આ પ્લાન્ટ બનાવશે, જેનાથી 2,000 લોકોને રોજગારી મળશે.
આ જાહેરાત અસાહિ ઈન્ડિયા ગ્લાસ, ગોલ્ડ પ્લસ ગ્લાસ ઈન્ડસ્ટ્રી અને ટેક્સટાઈલ મેન્યુફેક્ચર ચિરિપાલ ગ્રુપ દ્વારા સોલર ગ્લાસ પ્રોડક્શનની જાહેરાત કરાયા બાદ થઈ છે. બોરોસિલ રિન્યુએબલ્સ કે જે હાલમાં ભારતમાં એકમાત્ર સોલર ગ્લાસ મેન્યુફેક્ચરર છે, તે પણ આક્રમક રીતે પોતાના બિઝનેસનું વિસ્તરણ કરી રહી છે. બોરોસિલ પાસે ભારત અને જર્મનીમાં દરરોજ 1,300 ટન સોલર ગ્લાસ બનાવવાની કેપેસિટી છે, જેમાંથી 300 ટન ગ્લાસ દરરોજ જર્મનીમાં બને છે. જે તેના માટે યુરોપની મોટા સોલર ગ્લાસ મેન્યુફેક્ચરર ઈન્ટરફ્લોટ ગ્રુપને હસ્તગત કર્યા બાદ શક્ય બન્યું છે. જ્યારે ગોલ્ડ પ્લસ ગ્લાસ અને ચિરિપાલ ગ્રુપની ગ્રુ એનર્જી દરરોજ 300 ટન સોલર ગ્લાસ બનાવવાની કેપેસિટી ઊભી કરવાની યોજના બનાવી રહી છે. તો, અસાહિ ઈન્ડિયા ગ્લાસ કંપની પોલીફિલ્મ મેકર વિશાખા ગ્રુપ સાથે મળી વાર્ષિક 3 GWની વીજળી ઉત્પન્ન થાય તેટલા સોલર પેનલ ઈન્સ્ટોલેશન થઈ શકે તેટલા સોલર ગ્લાસ બનાવી શકાય તેવો પ્લાન્ટ ઊભો કરી રહી છે.
ઉલ્લેખનીય છે કે, ભારતે વર્ષ 2021માં 430 કરોડ ડોલરના સોલર સેલ્સ અને પેનલની આયાત કરી હતી, જેમાંથી મોટાભાગે ચીન, મલેશિયા અને ઈઝરાયલમાંથી આયાત કરાઈ છે. જેને પગલે હાલમાં ભારત દુનિયામાં ત્રીજું સૌથી મોટું સોલર ઈમ્પોર્ટ કરનારો દેશ બની ગયો છે. પરંતુ, ભારતની આ બીજા દેશો પરની નિર્ભરતા દૂર કરવા હવે દેશની આ ક્ષેત્રની નાની-મોટી કંપનીઓએ કામ કરવાનું શરૂ કરી દીધું છે. આજે રિલાયન્સ, ટાટા પાવર, જેએસડબ્લુય સહિત ભારતની 15થી પણ વધુ કંપનીઓએ સોલર પેનલ મેન્યુફેક્ચરિંગ સેક્ટરમાં ઝંપલાવ્યું છે.