ગુજરાત ATS અને કોસ્ટગાર્ડના સંયુક્ત ઓપરેશનમાં અરબ સાગરની ભારતીય જળ સીમાના જખૌ પાસેથી 300 કરોડ રૂપિયાની હેરોઇન જપ્ત કરવામાં આવી છે. ગુજરાત એટીએસ અને ભારતીય કોસ્ટગાર્ડના સંયુક્ત ઓપરેશનમાં ગુજરાતના દરિયા કિનારે જખૌ પાસે એક પાકિસ્તાની બોટ અલ હજને ઘેરીને તેની તપાસ કરવામાં આવી હતી જેમાંથી આશરે 56 કિલો માદક પદાર્થ પકડાયો હતો. માદક પદાર્થ હેરોઇન છે. એટીએસે નવ પાકિસ્તાની તસ્કરોની પણ ધરપકડ કરી છે.
સંરક્ષણ વિભાગના જનસંપર્ક અધિકારી અનુસાર એટીએસ અને કોસ્ટ ગાર્ડે મળીને અરબ સાગરમાં ભારતીય જળ સીમાની અંદર એક પાકિસ્તાની બોટને પકડી છે જેમાં 9 લોકો સવાર હતા. એટીએસ પકડેલા નવ પાકિસ્તાની તસ્કરોને પણ પોતાની સાથે લઇ ગઇ છે.
સૌરાષ્ટ્ર-કચ્છનો દરિયાકિનારો અનેક વખત એપી સેન્ટર રહ્યું છે. સૌરાષ્ટ્રનો દરિયાકિનારો ગેટવે ઓફ ગુજરાત બની ગયો છે. આતંકવાદી, RDX, હથિયારો અને ડ્રગ્સની ઘૂસણખોરીનો માર્ગ અહીં મોકળો છે. ગઇકાલે જામખંભાળિયાના દરિયાકિનારેથી 350 કરોડથી વધુનું ડ્રગ્સ ઝડપાયું હતું, જેનાથી સમગ્ર સૌરાષ્ટ્રના દરિયાકિનારાની સુરક્ષા પર મોટો સવાલ ઊભો થયો છે. છેલ્લાં પાંચ વર્ષમાં ગુજરાત ATS અને કોસ્ટગાર્ડે 30 હજાર કરોડનું ડ્રગ્સ પકડી પાડ્યું છે.