બોલિવૂડ એક્ટ્રેસ સારા અલી ખાને ગઇકાલે મોડી રાત્રે ઈન્સ્ટાગ્રામ પર એક પોસ્ટ શેર કરી હતી. આ પોસ્ટમાં સારાએ કહ્યું હતું કે તેના ડ્રાઈવરનો કોરોના રિપોર્ટ પોઝિટિવ આવ્યો છે. રિપોર્ટ આવ્યા બાદ ડ્રાઈવરને ક્વોરેન્ટાઇન સેન્ટરમાં મોકલી દેવામાં આવ્યો છે.
સારાએ પોસ્ટમાં કહ્યું હતું, ‘હું તમને કહેવા માગું છું કે, અમારા ડ્રાઈવરનો કોરોના રિપોર્ટ પોઝિટિવ આવ્યો છે. રિપોર્ટ મળતા જ BMCને આ અંગે માહિતી આપવામાં આવી હતી અને ડ્રાઈવરને ક્વૉરન્ટીન સેન્ટરમાં મોકલી દેવામાં આવ્યો હતો. મારા પરિવારના લોકો, ઘરના સ્ટાફ તથા મારો રિપોર્ટ નેગેટિવ આવ્યો છે. અમે જરૂરી સાવધાની રાખી રહ્યાં છીએ અને BMCએ આપેલી ગાઈડલાઈન માટે આભાર.’
ઉલ્લેખનીય છે કે હાલમાં જ અમિતાભ બચ્ચન, અભિષેક-ઐશ્વર્યા-આરાધ્યાનો રિપોર્ટ પોઝિટિવ આવ્યો હતો. અમિતાભ તથા અભિષેક નાણાવટી હોસ્પિટલમાં દાખલ છે, જ્યારે ઐશ્વર્યા-આરાધ્યા હોમ ક્વૉરન્ટીન છે. હાલમાં જ રેખાના બંગલાના સિક્યોરિટી ગાર્ડનો રિપોર્ટ પોઝિટિવ આવ્યો હતો અને તેથી જ બંગલાને સીલ કરવામાં આવ્યો છે. ભૂતકાળમાં બોની કપૂર, કરન જોહર, આમિર ખાનના સ્ટાફ મેમ્બર્સ પોઝિટિવ આવ્યા હતાં.
સારાના વર્કફ્રન્ટની વાત કરીએ તો તે વરુણ ધવન સાથે ફિલ્મ ‘કુલી નંબર 1’માં જોવા મળશે. આ ફિલ્મ 1 મેએ રિલીઝ થવાની હતી પરંતુ લોકડાઉનને કારણે ફિલ્મ રિલીઝ થઈ શકી ન હતી. આ ફિલ્મ હવે આવતા વર્ષે દિવાળી પર રિલીઝ થાય તેવી શક્યતા છે. આ ઉપરાંત પણ સારા અલી ખાન ડિરેક્ટર આનંદ એલ રાયની ફિલ્મ ‘અતરંગી રે’માં અક્ષય કુમાર તથા ધનુષ સાથે જોવા મળશે.-