પતિ પત્ની વચ્ચે સામાન્ય બાબતોમાં ઝઘડા થતા રહે છે. પરંતુ ક્યારેક આ ઝઘડાનું ગંભીર પરિણામ આવતું હોય છે. ઝઘડાથી માઠું લાગી જતા પતિ કે પત્ની પોતાનું જીવન ટૂંકાવતા હોવાની ઘટનાઓ છાસવારે બને છે. આવી જ એક ઘટના સુરતમાં બની છે જેમાં પતિ પત્ની વચ્ચેના ઝઘડા બાદ પત્નીએ ફાંસો ખાઇને જીવન ટૂંકાવ્યું હતું.
સુરતના ડભોલીની પરિણીતાનો પતિ સાથે વતન જામનગર જવા બાબતે ઝઘડો થયો હતો. આ ઝઘડાથી માઠું લાગી આવતા પરિણીતાએ પોતાના ઘરે ફાંસો ખાઇ આપઘાત કરી લીધો હતો.
મળતી માહિતી પ્રમાણે ડભોલી ભુવનેશ્વર સોસાયટી ખાતે રહેતા પરેશ શેરીયા રત્નકલાકાર છે. તેમની ૩૨ વર્ષીય પત્ની કૃપા સાથે વતન જામનગર જવા બાબતે બોલાચાલી થઇ હતી. સંતાનોનું વેકેશન હોવાથી કૃપા બાળકો સાથે વતન જવા ઇચ્છતી હતી. પરંતુ પતિએ થોડા દિવસ બાદ જવાનું કહ્યું હતું.
જે બાબતે પતિ-પત્ની વચ્ચે બોલાચાલી થયા બાદ ઝઘડો થયો હતો.જેનું માઠું લાગી આવતા તેણીએ પોતાના ઘરે ફાંસોખાઇને જીવન ટૂંકાવ્યું હતું. આ અંગે ચોકબજાર પોલીસે વધુ તપાસ હાથધરી છે.
સુરતમાં વતન જવા બાબતે પતિ સાથે ઝઘડો થતા પત્નીનો આપઘાત
