ઈસ્કોન બ્રિજ અકસ્માત કેસમાં તથ્ય પટેલ હાલમાં જેલમાં બંધ છે. તેની જામીન અરજી પર સુનાવણી થવાની હતી તે જ દિવસે તેણે પોતાની જામીન અરજી પાછી ખેંચી લીધી હતી. જોકે, હવે આ કેસમાં કેટલાક નવા તથ્યો સામે આવ્યા છે. હવે તથ્ય પટેલ સામે અગાઉના કાર અકસ્માતોમાં વીમો ક્લેમ કરવા માટે નકલી દસ્તાવેજો બનાવવા બદલ વધુ બે FIR દાખલ થવાની સંભાવના છે. પોલીસ તથ્ય પટેલ અને તેના કાકા સંજય ઉર્ફે મોન્ટુ પટેલ સામે ઇસ્કોન બ્રિજ અકસ્માત પહેલાં કથિત રીતે સંડોવાયેલા અગાઉના બે અકસ્માતોમાં એક્સિડેન્ટ ક્લેમની રકમ મેળવવા માટે બનાવટી દસ્તાવેજો રજૂ કરવા બદલ બે નવી FIR દાખલ કરે તેવી શક્યતા છે. 20મી જુલાઈના રોજ ઈસ્કોન બ્રિજના અકસ્માતની ઘટના પહેલા તથ્ય પટેલ દ્વારા કથિત રીતે કરાયેલા બે અકસ્માતો અંગે એન ડિવિઝન ટ્રાફિક પોલીસ દ્વારા કરવામાં આવેલી તપાસ દરમિયાન નવા ખુલાસા સામે આવ્યા છે. ઈસ્કોન બ્રિજ પર તથ્ય પટેલ દ્વારા સર્જાયેલા અકસ્માતમાં નવ લોકોના મોત થયા હતા.
કેસની વિગતો મુજબ 1 જાન્યુઆરીની વહેલી સવારે સાંતેજ ખાતે મંદિરના થાંભલા સાથે તેની જગુઆર કાર અથડાવવા બદલ તથ્ય પટેલ સામે એફઆઈઆર નોંધવામાં આવી હતી. તથ્યએ વીમા કંપની પાસેથી રિપેરિંગ ખર્ચની ભરપાઈ કરવાનો દાવો કર્યો હતો અને તેને 14 લાખ રૂપિયા મેળવ્યા હતા. તેણે રજૂઆત કરી હતી કે રસ્તાની વચ્ચે આવેલા પ્રાણીને બચાવવા જતાં તેની કાર શીલજ ખાતે એક થાંભલા સાથે અથડાઈ હતી. જોકે, પોલીસનું માનવું છે કે તેણે વીમા કંપની સમક્ષ આવું નિવેદન આપ્યું છે. વાસ્તવમાં આ દુર્ઘટના શીલજથી દૂર સાંતેજ ખાતે મંદિર પાસે બની હતી.
બીજી તરફ તેની થારને એક કાફેની કમ્પાઉન્ડ વોલ સાથે અથડાવાના કિસ્સામાં બેફામ ડ્રાઈવિંગ કરવા બદલ તેની સામે એફઆઈઆર નોંધવામાં આવી હતી. જોકે, જ્યારે પોલીસે વીમાના દસ્તાવેજો મેળવ્યા હતા તેમાં એવું કહેવામાં આવ્યું હતું કે સંજય પટેલ દ્વારા તેમના બંગલાની દિવાલ સાથે અથડાવાને કારણે કારને નુકસાન થયું હતું. આથી આ કેસમાં વીમા કંપની સમક્ષ ખોટું જાહેરનામું પણ કરવામાં આવ્યું હતું. તેથી તેની સામે ખોટા ડેક્લેરેશન અને બનાવટી દસ્તાવેજોની બે ફરિયાદો દાખલ થઈ શકે છે. કાયદા મુજબ પોલીસે અકસ્માતના ત્રણેય કેસોમાં ચાર્જશીટ દાખલ કરી છે, તેમને તથ્ય અને તેના કાકા સામે બનાવટી દસ્તાવેજો રજૂ કરવા બદલ અલગ-અલગ એફઆઈઆર દાખલ કરવી પડશે.
