અમદાવાદ શહેરના ઈન્ટરનેશનલ એરપોર્ટ પરથી ગોલ્ડ સ્મગલિંગના કિસ્સાઓ સતત વધી રહ્યા છે. તેવામાં 80 લાખ રૂપિયાની કિંમતનું ગોલ્ડ લઈને દોઢ કિલો સોનાની દાણચોરીના કેસમાં ક્લાસ-2 ઓફિસરની સંડોવણી સામે આવતા ચકચાર મચી ગઈ છે. દુબઈથી અમદાવાદ એરપોર્ટ પર GSTમાં કાર્યરત ક્લાસ-2 ઓફિસરની DRIએ ધરપકડ કરી લીધી છે. બૂટલેગરો અને દાણચોરોની યાદીમાં ક્લાસ-2 અધિકારીઓના નામ પણ સામે ખૂલતા જબરો કેસમાં વળાંક આવ્યો છે.
DRI અધિકારીએ આના માટે સૌથી પહેલા બાતમીના આધારે આખી ટીમ તૈનાત કરી હતી. મીડિયા રિપોર્ટ્સ પ્રમાણે અમદાવાદ એરપોર્ટ પર આવેલા ક્લાસ-2 અધિકારીને તાત્કાલિક ઝડપી પાડવામાં આવ્યા હતા. એટલું જ નહીં તેમને એરપોર્ટ પર જ સોનાની લેતી દેતી કરી હોવાની માહિતી પણ DRIને મળી હતી. આથી કરીને આ એન્ગલથી તપાસ શરૂ કરી હતી. જોકે સમગ્ર કૌભાંડના તાર દુબઈથી જોડાયેલા હોવાથી કોના ઈશારે આ બધુ થયું અને ત્યાં કોણ માસ્ટર માઈન્ડ આ પ્રમાણેનું ગોલ્ડ સ્મગલિંગ રેકેટ ચલાવે છે એ તપાસનો વિષય બની ગયો છે.
DRIએ પૂછપરછ હજુ કરી રહી છે કે કોની સાથે મળીને આ કૌભાંડ કરાઈ રહ્યું છે. એટલું જ નહીં 80 લાખ રૂપિયાનું સોનુ લઈને આવી રહેલા આ ક્લાસ-2 અધિકારી સામે શું પગલાં ભરાશે એ પણ ચર્ચાનો વિષય બન્યો છે. બીજી બાજુ ગ્રાઉન્ડ સ્ટાફના કર્મચારીઓના નામ પણ ખુલ્યા હોવાનું સામે આવી રહ્યું છે. વિગતે નજર કરીએ તો અહીંના કર્મચારી પાસેથી પણ ગોલ્ડનો જથ્થો મળ્યો હોવાના અહેવાલો સામે આવી રહ્યા છે.