અમેરિકન શોર્ટ સેલર હિન્ડનબર્ગ રિસર્ચે જાન્યુઆરીમાં અદાણી ગ્રૂપ સામે ગંભીર આરોપો મુક્યા પછી અદાણીના શેરોમાં તીવ્ર ઘટાડો આવ્યો છે, પરંતુ હવે મોરેશિયસના મંત્રીએ હિન્ડનબર્ગ રિસર્ચના અહેવાલની ઝાટકણી કાઢતા અદાણીના શેરોમાં આજે ઉછાળો જોવા મળ્યો છે. આ ઉપરાંત અદાણી એન્ટરપ્રાઈઝિસે (Adani Enterprises) ફંડ એકત્ર કરવાની કામગીરી શરૂ કરી છે જેના કારણે પોઝિટિવ સેન્ટીમેન્ટ જોવા મળ્યું છે. અદાણી એન્ટરપ્રાઈઝિસનો શેર આજે 4 ટકાથી વધારે વધીને 1975 સુધી ગયો હતો. આ લખાય છે ત્યારે આ શેર 3.50 ટકા વધીને 1958 પર ચાલતો હતો. આ શેરની બાવન સપ્તાહની હાઈ સપાટી રૂ. 4190 અને 52 વીકની નીચી સપાટી રૂ. 1017 છે.
મોરેશિયસના ફાઈનાન્સ મંત્રી મહેન કુમારે હિન્ડનબર્ગ રિસર્ચે અદાણીની શેલ કંપનીઓ અંગે મુકેલા આરોપોને ફગાવી દીધા છે. હિન્ડનબર્ગનો આરોપ હતો કે મોરેશિયસમાં અદાણી ગ્રૂપ કેટલીક શેલ કંપનીઓ ચલાવે છે અને નાણાકીય ગોટાળા કરે છે. પરંતુ મહેન કુમારે પહેલી વખત આ રિપોર્ટને નકારી કાઢ્યા પછી અદાણીના શેરોમાં તેજી જોવા મળી છે.
મોરેશિયસના ફાઈનાન્સ મંત્રી મહેન કુમારે હિન્ડનબર્ગના તમામ આરોપોને ફગાવી દીધા છે અને કહ્યું છે કે આ આરોપો ખોટા અને આધાર વગરના છે. તેમણે દાવો કર્યો કે મોરેશિયસ OECDના ટેક્સ રુલ્સનું બરાબર પાલન કરે છે. તે કાયદા પ્રમાણે મોરેશિયસમાં કોઈ શેલ કંપની ચલાવવાની મંજૂરી નથી.
