હાલમાં એક પોડકાસ્ટ શો સાથે વાતચીત કરતાં પ્રિયંકા ચોપરાએ (Priyanka Chopra) બોલિવુડમાંથી એક્ઝિટ લેવા પાછળના કારણનો ખુલાસો કર્યો હતો. તેણે કહ્યું હતું કે, ઈન્ડસ્ટ્રીમાં તેની સામે એક ગેંગ બનાવવામાં આવી હતી અને તેઓ તેને કામ આપતા નહોતા. તે તેમનાથી એટલી પરેશાન થઈ ગઈ હતી કે બાદમાં હોલિવુડ તરફ પ્રયાણ કરવાનો નિર્ણય લીધો હતો. જે બાદ કંગના રનૌતે (Kangana Ranaut) તેને સપોર્ટ આપ્યો હતો અને કરણ જોહર (Karan Johar) પર પ્રહાર કરતાં તેને ‘મૂવી માફિયા’ ગણાવ્યો હતો. જે બાદ હાલમાં જ્યારે એરપોર્ટ પર જોવા મળી ત્યારે ફોટોગ્રાફર્સને આ મામલે સવાલ ન પૂછવા અંગે ટોણો માર્યો હતો. હવે, કરણે તેને આડકતરી રીતે જવાબ આપ્યો છે.
કરણ જોહરે ઈન્સ્ટાગ્રામ સ્ટોરીમાં લખ્યું છે ‘એરપોર્ટ રનવે છે… તે પ્રેસ કોન્ફરન્સનું સ્થાન પણ છે… બની શકે કે ખૂબ જલ્દી ત્યાં ટ્રેલર લોન્ચ ઈવેન્ટ પણ યોજવામાં આવે. (મેં બધા માટે સબસ્ક્રાઈબ કરી લીધું છે… કોઈ ફરિયાદ નથી… પરંતુ આ દરમિયાન ફ્લાઈટ પકડવાનું પણ ગમશે)’ બીજી સ્ટોરીમાં લખ્યું છે ‘હું મેકઅપ ટ્યુટોરિયલથી ઓબ્સેસ્ડ છું (તેની રિલ્સ જોઈને મને ખુશી મળે છે). આખી દુકાન દુલ્હનના ચહેરા પર થોપી દે છે. પરંતુ અંતમાં પરિણામ સ્ટનિંગ હોય છે અને મને આ હેક પસંદ છે’. આગળ લખ્યું છે ‘આજકાલ હું રોજ સવારે ઉઠીને ટ્યુટોરિયલ લઉ છું. મારા માટે આ એક રિયાઝ છે પર્સનાલિટી ચેન્જ માટે. મારી પ્લસ સાઈઝ બોડીને સેલ્ફ લવની જરૂર છે’ અંતમાં લખ્યું છે ‘રવિના સોન્ગ કરતાં વધારે મને આજકાલ એથનિક ડ્રેસ પહેરતા લોકોનું ઓબ્સેશન છે. પ્લોટ મિસ કર્યા વગર કંઈક એવુ બનાવવાનો પ્રયાસ કરીશ’.
જણાવી દઈએ કે, કંગના રનૌત જ્યારે એરપોર્ટ પર જોવા મળી જ્યારે ફોટોગ્રાફર્સને કહ્યું હતું કે ‘આમ તો તમે લોકો ચાલક છો હમમ? જો ફિલ્મ માફિયાની કોઈ કોન્ટ્રોવર્સી હોય તો તમે સવાલ નથી પૂછતાં અને જો મારી કોઈ કોન્ટ્રોવર્સી હોય તો બૂમો પાડો છો. તમે લોકો સવાલ કેમ નથી પૂછતાં, હું બધું સમજું છું’. તેની વાતના જવાબમાં ફોટોગ્રાફર્સ માત્ર હસ્યા હતા. તે એરપોર્ટ પર એથનિક ડ્રેસ પહેરીને આવી હતી.
વર્ક ફ્રંટની વાત કરીએ તો, કરણ જોહર તેની ડિરેક્શનમાં બનેલી ફિલ્મ ‘રોકી ઓર રાની કી પ્રેમ કહાણી’ની રિલીઝની રાહ જોઈ રહ્યો છે, જે જુલાઈમાં થિયેટરમાં આવવાની છે. આ ફિલ્મમાં આલિયા ભટ્ટ અને રણવીર સિંહ સિવાય ધર્મેન્દ્ર, ડિમ્પલ કાપડિયા અને જયા બચ્ચન પણ મહત્વના રોલમાં છે. ફિલ્મનું શૂટિંગ પૂરું થઈ ગયું છે અને હાલ પોસ્ટ પ્રોડક્શનનું કામ ચાલી રહ્યું છે.
