પીઠની ઈજાને કારણે ફાસ્ટ બોલર દીપક ચહરની ઈન્ડિયન પ્રીમિયર લીગ (IPL) ની 15મી સિઝનમાં રમવાની શક્યતા લગભગ સમાપ્ત થઈ ગઈ છે. જે ચેન્નઈ સુપર કિંગ્સ (CSK) માટે મુશ્કેલીમાં વધારો કરી શકે છે. શરૂઆતમાં સુપર કિંગ્સને આશા હતી કે તે એપ્રિલના છેલ્લા અઠવાડિયામાં પુનરાગમન કરી શકશે.
બોલિંગ ઓલરાઉન્ડરને ફેબ્રુઆરીમાં વેસ્ટ ઈન્ડિઝ સામેની ત્રીજી T20I દરમિયાન પગમાં ઈજા થઈ હતી અને તેણે પોતાનો સ્પેલ પૂરો કર્યા વિના મેદાન છોડવું પડ્યું હતું. આ પછી ચહર શ્રીલંકા સામેની શ્રેણીમાં રમી શક્યો ન હતો. ચહરે ગયા વર્ષે ટીમને ખિતાબ જીતાડવામાં મહત્વની ભૂમિકા ભજવી હતી.
સૂત્રોના જણાવ્યા અનુસાર, ભારત અને ચેન્નાઈ સુપર કિંગ્સના આ ફાસ્ટ બોલરને બેંગલુરુમાં નેશનલ ક્રિકેટ એકેડમી (NCA)માં રિહેબિલિટેશન દરમિયાન ઈજા થઈ હતી.
જો કે બોર્ડ દ્વારા ઈજાની ગંભીરતા હજુ સુધી નક્કી કરવામાં આવી નથી, પરંતુ હેમસ્ટ્રિંગની ઈજાને પગલે પીઠની ઈજાને દીપકની વાપસીની આશા પર મોટો આંચકો માનવામાં આવે છે. વર્તમાન સિઝનમાં ચેન્નઈ સુપર કિંગ્સની બોલિંગ મુશ્કેલીનો સામનો કરી રહી છે, દીપક ચહરનું સમગ્ર સિઝનમાંથી બહાર થવું ચેન્નઈ માટે ખૂબ જ ચિંતાનો વિષય હશે. દીપક ચહરને ચેન્નઈ સુપર કિંગ્સે 14 કરોડમાં ખરીદ્યો હતો.
IPLમાં ચેન્નઈ સુપર કિંગ્સ સાથે ભારતીય ટીમ મેનેજમેન્ટ પણ દીપક ચહરની ફિટનેસ પર બારીકાઈથી નજર રાખી રહ્યું છે. દીપક ચહર ઓક્ટોબરમાં રમાનારા T20 વર્લ્ડ કપ પહેલા સંપૂર્ણ રીતે ફિટ થઈ જાય ટીમ મેનેજમેન્ટનો આ પ્રયાસ રહેશે.
ચેન્નઈને અત્યાર સુધીની તમામ 4 મેચોમાં ભારે હારનો સામનો કરવો પડ્યો છે, તમામ મેચોમાં ચેન્નઈની બોલિંગે નિરાશ કર્યા છે.
દીપક ચહર CSKમાંથી બહાર
