દિલ્હીમાં એક ૧૪ વર્ષના તરુણની ત્રણ જેટલા તરુણો અને અન્ય એક યુવકે છરીના ઘા મારીને હત્યા કરી નાખ્યાની ઘટના સામે આવી છે. પોલીસના જણાવ્યા પ્રમાણે આરોપીઓમાંથી એકની ગર્લફેન્ડ સાથે મૃતક તરુણને મિત્રતા હોવાને કારણે ચારેય લોકોએ હત્યાકાંડનો અંજામ આપ્યો હતો. બનેલા આ બનાવમાં પોલીસે ત્રણ આરોપીઓની ધરપકડ કરી લીધી છે. ધરપકડ કરવામાં આવેલ તમામ કિશોરવયના છે.
પોલીસના જણાવ્યા પ્રમાણે શુક્રવારે મૃતક કિશોર જ્યારે તેના ઘરની નજીક ઉભી હતો ત્યાર ચારેય લોકોએ તેને વાતચીત માટે બોલાવ્યો હતો. બાદમાં આ વાતચીતે ઝઘડાનું સ્વરૂપ ધારણ કરી લીધું હતું અને ચારેય લોકોએ કિશોરને છરીના ઉપરા ઉપરી ઘા ઝીંકી દીધા હતા.
પીડિત કિશોરે બચાવો બચાવોની બૂમો પાડતા ચારેય લોકો ભાગી ગયા હતા. કિશોરની માતાએ તેને હોસ્પિટલમાં ખસેડ્યો હતો. જોકે, સારવાર દરમિયાન ઈજાને કારણે કિશોરનું મોત થઈ ગયું હતું. ગુસ્સે ભરાયેલા એક યુવકે પોતાના અન્ય ત્રણ મિત્રો સાથે મળીને પોતાની ગર્લફ્રેન્ડ સાથે મિત્રતા રાખનાર કિશોરની હત્યા કરી નાખવાનો પ્લાન ઘડ્યો હતો. પોલીસના જણાવ્યા પ્રમાણે આ ગુનામાં ત્રણ તરુણોની ધરપકડ કરવામાં આવી છે, જયારે એક યુવકની શોધખોળ કરવામાં આવી રહી છે.