ભારતની મોટી કંપનીઓએ તેમના પ્રથમ ક્વાર્ટરના રિઝલ્ટ એટલે કે જુલાઈ ક્વાર્ટરના પરિણામોની જાહેરાત કરી દીધી છે. તેમાં આ વખતે કેટલીક કંપનીઓએ આશ્ચર્યજનક દેખાવ કર્યો છે. દેશની સૌથી મોટી બેન્ક સ્ટેટ બેન્ક ઓફ ઈન્ડિયા (એસબીઆઈ)એ ત્રિમાસિક નફાના મોરચે રિલાયન્સ ઈન્ડસ્ટ્રીઝને પણ પાછળ રાખી દીધી છે. SBI આ વખતે RIL કરતા આગળ નીકળી ગઈ અને દેશની સૌથી મોટી નફાકારક કંપની બની ગઈ છે. ટોચની 10 કંપનીઓના નફાના આંકડા આ પ્રમાણે છે.
રિલાયન્સ ઈન્ડસ્ટ્રીઝ આ લિસ્ટમાં બીજા સ્થાન પર છે જેનો નફો રૂ. 18,182 કરોડ રૂપિયા નોંધાયો છે. કંપનીએ યર ટુ ડેટ 1.12 ટકા વળતર આપ્યું છે. આ શેર આજે 2566 પર ચાલે છે. છેલ્લા એક વર્ષમાં તેમાં 3.20 ટકાનો ઘટાડો થયો છે.
ઓએનજીસીએ પ્રથમ ક્વાર્ટરમાં 16,857 કરોડનો નફો કર્યો છે અને દેશની સૌથી મોટી નફાકારક કંપનીઓમાં ત્રીજા સ્થાન પર છે. આ શેરમાં યર ટુ ડેટ રિટર્ન 21.25 ટકા મળ્યું છે. આ શેર હાલમાં 177 રૂપિયાના લેવલ પર છે. છેલ્લા એક વર્ષમાં આ શેર 27 ટકા વધ્યો છે.
ચોથા નંબર પર આઈઓસી છે જેણે પ્રથમ ક્વાર્ટરમાં 14,396 કરોડ રૂપિયાનો નફો નોંધાવ્યો હતો. આ શેરમાં યર ટુ ડેટ રિટર્ન 21 ટકા છે. એટલે કે 1 જાન્યુઆરી 2023થી અત્યાર સુધીમાં આ શેર 21 ટકા વધ્યો છે. આ શેર હાલમાં 93ની આસપાસ ચાલે છે. છેલ્લા એક વર્ષમાં આ શેર 27 ટકા વધ્યો છે.
ત્યાર બાદ આ લિસ્ટમાં એચડીએફસી બેન્કનું નામ સામેલ છે. એચડીએફસી બેન્કનો પ્રથમ ક્વાર્ટરનો નફો 12,403 કરોડ રૂપિયા નોંધાયો હતો. આ શેરમાં યર ટુ ડેટ રિટર્ન માઈનસ 1.04 ટકા છે.
ટીસીએસ (ટાટા કન્સલ્ટન્સી સર્વિસિસ)નો પ્રથમ ક્વાર્ટરનો નફો રૂ. 11,120 કરોડ રૂપિયા નોંધાયો હતો. આ શેરમાં યર ટુ ડેટ રિટર્ન 5.85 ટકા નોંધાયું છે. ICICI Bankનો પ્રથમ ક્વાર્ટરનો નફો રૂ. 10,763 કરોડ રૂપિયા નોંધાયો છે. ચાલુ વર્ષમાં આ શેર 7.56 ટકા વધ્યો છે. જ્યારે ભારત પેટ્રોલિયમનો નફો 10,168 કરોડ રૂપિયા નોંધાયો છે અને યર ટુ ડેટ રિટર્ન 7.85 ટકા છે.
અદાણી પાવરના શેરમાં ચાલુ વર્ષમાં 4.53 ટકાનો ઘટાડો થયો છે. આ કંપનીએ પ્રથમ ક્વાર્ટરમાં 8759 કરોડ રૂપિયાનો નફો નોંધાવ્યો છે. કોલ ઈન્ડિયાનો નફો 7964 કરોડ રૂપિયા નોંધાયો છે અને યર ટુ ડેટ રિટર્ન 3.89 ટકા છે.
