તાઈવાનની કંપની ફોક્સકોન (Foxconn) અને વેદાંતા જૂથે ગુજરાતમાં સેમી કન્ડક્ટર પ્લાન્ટ સ્થાપવા માટે એગ્રીમેન્ટ કર્યા હતા જે તૂટી ગયા છે ત્યારે બીજી તરફ ફોક્સકોને તમિલનાડુમાં એપલની પ્રોડક્ટ્સનું ઉત્પાદન પણ શરૂ કરી દીધું છે. ફોક્સકોન સપ્ટેમ્બરથી તમિલનાડુમાં iPhoneના લેટેસ્ટ મોડેલનું ઉત્પાદન શરૂ કરવાની હતી, પરંતુ એક મહિના અગાઉ જ કામગીરી ચાલુ કરી દીધી છે. બીજી તરફ ગુજરાતમાં કઈ કંપની ક્યારે ચિપ્સ પ્લાન્ટ શરૂ કરશે તે હજુ નક્કી નથી.
લેટેસ્ટ અહેવાલ અનુસાર નેક્સ્ટ જનરેશન iPhone 15નું ઉત્પાદન તમિલનાડુથી શરૂ કરી દેવામાં આવ્યું છે. ચીનમાંથી આ ફોન બહાર આવે તેના અઠવાડિયાની અંદર જ ભારતમાંથી પણ તેની ડિલિવરી શરૂ થવાની શક્યતા છે. ચીનના મેન્યુફેક્ચરિંગ બેઝ અને ભારતના ઓપરેશન્સ વચ્ચે મોટો તફાવત રાખવામાં નહીં આવે. બંને જગ્યાએ લગભગ એક સાથે જ કામ થશે.
ફોક્સકોને તાજેતરમાં વેદાંતા સાથે છેડો ફાડવાની જાહેરાત કરી હતી. તેના કારણે વેદાંતા અને ફોક્સકોન દ્વારા ગુજરાતમાં સેમીકન્ડક્ટર બનાવવામાં આવે તેવી શક્યતા પર પૂર્ણ વિરામ મુકાઈ ગયું છે. વેદાંતાએ દાવો કર્યો છે કે તેણે પાર્ટનર તરીકે બીજી એક કંપની પસંદ કરી લીધી છે. પરંતુ ગુજરાતમાં પ્રથમ ચિપ કે સેમીકન્ડક્ટરનું ઉત્પાદન ક્યારે થશે તે હજુ નક્કી નથી. બીજી તરફ તમિલનાડુમાં ફોક્સકોને જે રોકાણની જાહેરાત કરી હતી તે પ્રમાણે કામગીરી શરૂ કરી દીધી છે.
તાજેતરમાં ગુજરાતમાં સેમીકન્ડક્ટર સેક્ટરમાં રોકાણ માટે ખાસ કાર્યક્રમ યોજાયો હતો જેમાં કેટલીક કંપનીઓ રાજ્યમાં જંગી મૂડીરોકાણ કરવા માટે તૈયાર થઈ છે. પરંતુ વાસ્તવમાં ક્યારે સેમીકન્ડક્ટરનું ઉત્પાદન થશે તે હજુ સ્પષ્ટ થયું નથી.
લેટેસ્ટ આઈફોન કેટલામાં મળશે?
એપલ દ્વારા આઈફોન 13ના ભાવે જ રેગ્યુલર મોડેલ વેચવામાં આવે તેવું આ બીજી વખત બનશે. એપલ દ્વારા iPhone 15 Plusની કિંમત 899 ડોલર અથવા 89,900 રૂપિયા રાખવામાં આવે તેવી શક્યતા છે. તેની સાથે તુલનામાં iPhone 15 પ્રો અને પ્રો મેક્સના ભાવમાં મોટો વધારો થઈ શકે છે. આઈફોન 15 પ્રોનો ભાવ વધીને 1099 ડોલર થઈ શકે છે જે ગયા વર્ષમાં 999 ડોલર હતો. ભારતમાં આઈફોન 14 પ્રો મોડેલને અમેરિકન માર્કેટ પ્રાઈસ કરતા 300 ડોલર ઉંચા ભાવે લોન્ચ કરવામાં આવ્યો છે. એક્સપર્ટ માને છે કે અમેરિકન બજારની તુલનામાં ભારતમાં iPhone 15 Proનો ભાવ લગભગ 99 ડોલર વધારે હશે. રૂપિયામાં જોવામાં આવે તો કદાચ 10,000 રૂપિયા વધારે ભાવ રાખવામાં આવશે.
